भांगरभूंय | प्रतिनिधी
प्रवेशिका दाखल करपाची निमाणी तारीख ८ जानेवारी
पणजी: कला अकादमी आयोजीत अंदूंची कोंकणी नाट्य सर्त फेब्रुवारी म्हयन्याच्या दुसर्या सप्तका सावन राजीव गांधी कला मंदीर फोंड्यां सुरू जातली. हे सर्तींत वांटेकार जावपाक इत्सूक आशिल्ल्या नोंदणीकृत संस्थानी आपल्यो प्रवेशिका दाखल करपाची निमाणी तारीख ८ जानेवारी आसा. हे नाट्य सर्तीचे नेम आनी अटी तशेंच विहीत नमुन्यांतल्यो प्रवेशिका आदिलशाह पॅलेस, पोरणें सचिवालय, पाटो-पणजीच्या कला अकादमीचे येवकार कुडींत फुकट उपलब्ध आसा. तशेंच कला अकादमीचे वेबसायटीचेर उपलब्ध आसात.
इत्सूक नाट्यसंस्थांनी पुराय भरिल्ले प्रवेशिके वांगडा प्रवेशशुल्क रु. ५०० आनी अनामत रक्कम म्हणून रु. ५००० अकादमीकडेन भरप गरजेचें. ही रक्कम कार्यालयीन कामाच्या दिसा सद्दां सकाळीं १० ते दनपरां १ आनी दनपरां २ ते सांजेवेळार ४ वरां मेरेन स्विकारतले. १८६० च्या कायद्या खाला नोंदणी आनी नुतनीकरण जाल्ल्या संस्थांकूच हे सर्तींत वांटेकार जावपाक मेळटलें. प्रवेशिका दाखल करपाच्या वेळार सदर संस्था नोंदणी वा नुतनीकरणाची
साक्षांकीत प्रत वांगडा जोडप गरजेचें.
सर्तींतलो सादरीकरणाचो नंबर त्याच दिसा म्हळ्यार ता. ८ जानेवारी २०२५ दिसा सांजेवेळार ५ वरांचेर आदिलशाह पॅलेस हांगा कला अकादमीच्या कार्यालयांत सगळ्या संस्था प्रतिनिधींच्या मुखार चिटयो उडोवन थारयतले. उपरांत प्रवेशिका फाटीं घेवपा खातीर ५ दिसांची मुजत आशिल्ल्यान ह्या निर्धारीत मुजती उपरांत प्रवेशिका फाटीं घेवपाक मेळच्यो ना. तरी हे निमाणे मुजतीची नोंद घेवन सगळ्या इत्सूक नाट्य संस्थानी आपल्यो प्रवेशिका निर्धारीत मुदतींत दाखल करच्यो अशें कला अकादमीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
