भांगरभूंय | प्रतिनिधी
कलाकारांनी सुपारी घेतिल्ल्याच्या मंत्री गोविंद गावडेंच्या आरोपाचो केलो निशेध
पणजी: नुतनीकरणा उपरांत कला अकादमीची लायटिंग, सावंड तशेंच हेर यंत्रणेचो दर्जो सुदारपा बदला तो बाबत जाला. कृती दळाक सहकार्य करपा बदला कला आनी संस्कृती खात्याचे मंत्री गोविंद गावडे हे कलाकारांनी सुपारी घेतिल्ल्याचो आरोप करतात. हाचो निशेध करपा खातीर कला राखण मांड कला अकादमी भायर सुपारी आंदोलन करतले. कला राखण मांडाचे निमंत्रक देविदास आमोणकार हाणी ही म्हायती दिली.
कला राखण मांडाचे देविदास आमोणकार, संदेश प्रभुदेसाय, सेसील रॉड्रिग्ज हांणी कला अकादमी भायर पत्रकार परिशद घेतली.
‘पुरूष’ नाटकाच्या प्रयोगा वेळार कला अकादमींत लायट पिकपिकपाक लागली. हाचे उपरांत आनीक एका प्रयोगा वेळार एसी चला ना जाली. कला अकादमी नुतनीकरणा उपरांत अशे तरेच्यो गजाली जायत आसात. कामाचो बाबत दर्जो हें हाचें फाटलें कारण आसा. ‘पुरूष’ नाटकाच्या प्रयोगा वेळार लायट पिकपिकपाक लागपाचे घडणुके उपरांत मंत्री गोविंद गावडे हांणी शरद पोंक्षे हांचेर सुपारीबाज असो आरोप केलो. ह्या आरोपाचो कला राखण मांड निशेध करता, अशें संदेश प्रभुदेसाय हांणी सांगलें.
कला अकादमीच्या कामाचो अभ्यास करून अहवाल दिवपा खातीर मुख्यमंत्री डॉ. प्रमोद सावंत हांणी कृती दळाची स्थापणूक केल्या. कृती दळाच्या स्थापणुके विशीं आपणाक कांयच खबर ना, अशें मंंत्री गोविंद गावडे हांणी सांगलां. हाचो अर्थ मंत्री गोविंद गावडे हे मुख्यमंत्र्यांच्या आदेशाक पाळो दिनात हें सिद्द जाता. कला अकादमीच्या लायटिंग यंत्रणेंत तंत्रीक दोश आसात, हें कला आनी संस्कृत खात्याचे मंत्री गोविंद गावडे हांणी मान्य केलां. कृती दळाच्यो आतां मेरेन तीन बसका जाल्यात. सरकारी खातीं लेगीत कृती दळाक सहकार्य दिनात. हाचे खातीर कृती दळान मुख्यमंत्री डॉ. प्रमोद सावंत हांची भेट मागिल्ली. ही भेट अजून मेळना. ह्या सगल्या गजालींचो निशेध करपा खातीर सुपारी आंदोलन करपाचो निर्णय कला राखण मांडान घेतला. आंदोलनाची तारीख आजून निश्चीत जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
