भांगरभूंय | प्रतिनिधी
-आवाज, लायटी, आनी रंगमाचयेची शिफारसी प्रमाण जातली दुरुस्तीपणजीः कला अकादमी विशीं राज्य सरकारान स्थापन केल्ल्या कृती दळाच्या शिफारशी प्रमाण भौशीक बांदकाम खात्यान नाट्यगृहांतलो आवाज, उजवाड आनी रंगमाचये खातीर तीन सल्लागार नेमल्यात. तिगांय सल्लागारांनी दोन फावटीं नाट्यगृहाची तपासणी केल्या आनी तांच्या शिफारशी प्रमाण गरजेचे बदल करतले.
फाटलीं कांय वर्सां कला अकादमीचो विशय विधानसभेंत आनी भायर सातत्यान चर्चेचो विशय जावन आसा. दोन दीस आदीं नामनेचे अभिनेते शरद पोंक्षे हांणी अभिनय केल्ल्या ‘पुरुष’ ह्या नाटकांतलो अभिनय चालू आसतना उजवाड येवजणेंत इबाड जालो. देखून पोंक्षे हांणी नाटक मदींच थांबयल्लें आनी ‘धा मिनटां पड्डो बंद करून परत येता’ अशें सांगून रजा घेतिल्ली. हे घडणुकेक लागून कला अकादमी रंगमाची परत एक फावट चर्चेक आयल्या.
कला अकादमीचो जीर्णोध्दार जाले उपरांत कलाकारांनी परत परत नाट्यगृहांतल्या त्रुटी दाखयल्यो. हाचो फायदो घेवन विरोधी आमदारांनी मंत्री आनी कला अकादमीचे अध्यक्ष गोविंद गावडे हांचेर घोटाळ्याचो आरोप करपाक सुरवात केली. ते खातीर मुख्यमंत्री डॉ. प्रमोद सावंत हांणी नोव्हेंबर 2024 वर्सा विजय केंकरे हांच्या अध्यक्षते खाला कृती दळाची थापणूक करून प्रसाद लोलयेंकार हांची सरकार आनी कृती दळाचे समन्वयक म्हणून नेमणूक केल्ली. कार्यदळान अजून आपलो अहवाल सरकाराक सादर करूंक ना. पूण कामाचो नियाळ घेतले उपरांत पीडब्ल्यूडीक नाट्यगृहांतलो आवाज, उजवाड आनी माचये संबंदी तीन सल्लागार नेमपाची सुचोवणी दिली. ते प्रमाण पीडब्ल्यूडीन आवाजा खातीर रॉजर ड्रॅगो, उजवाड येवजणे खातीर शीतल तळपदे आनी रंगमाचये खातीर राजन भीसे हांची नेमणूक केल्या. ह्या तिनूय सल्लागारांनी दोन फावटीं नाट्यगृहाची तपासणी केल्या आनी फुडल्या सप्तकांत आपलो अहवाल सादर करतले. ‘भांगरभूंय’ कडेन उलयतना पीडब्ल्यूडी अभियंता वल्लभ पै हांणी नाट्यगृहाचेर काम ताच्या शिफारशी प्रमाण करतले अशी म्हायती दिली.
मजगतीं, मूळ कंत्राटांतली तरतूद पुराय जावंक ना आनी सल्लागारांनी त्योच तरतुदी सुचयल्यात जाल्यार मागीर मूळ कंत्राटदारा कडल्यान ती कामां करून घेतले. देखून सल्लागारांनी नव्यो गजाली सुचयल्यो जाल्यार सरकार स्वताच्या खर्चान त्यो पुराय करतले.
विरोधक कितें म्हणटात?
1. राज्य सरकारान कला अकादमीच्या ‘मरण प्रमाणपत्राचो’ मसुदो तयार करपाक सुरवात केल्या. राज्यांतल्या कलाकारां खातीर कला अकादमीचो प्रस्न सुटावो करपाचो सरकाराक स्वारस्य ना. हेर ‘इव्हेंट’ करपा खातीर सरकारा कडेन कोटी रुपया आसात. पूण, सरकार कला अकादमीक गंभीरतायेन घेना.
– युरी आलेमांव, विरोधी पक्ष फुडारी
कला अकादमी विशीं अभिनेते शरद पोंक्षे हांणी केल्ल्या सुचोवण्यां विशीं सरकार विचार करतले काय ना हो व्हडलो प्रस्न. ह्या विशयाचेर आमी परत परत सरकाराक घेरांव घाल्या. पूण, कला अकादमी विशीं सरकार गंभीर ना.
– विजय सरदेसाय, आमदार
शरद पोंक्षे हांच्या नाटका वेळार कला अकादमीच्या नाट्यगृहांत घडिल्ले घडणुकेक लागून देशांत आनी विदेशांत गोंयची बदनामी जाल्या. हाका लागून कला अकादमींत प्रयोगा खातीर येवपी राष्ट्रीय आनी आंतरराष्ट्रीय कलाकारां मदीं निरशेणी निर्माण जाल्या.
– मनोज परब, अध्यक्ष, आरजीपी
कला अकादमीच्या रंगमाचयेर एक नाटक सादर करतना जी घडणूक घडली ती अपूर्व आशिल्ली. कला अकादमीचे अध्यक्ष गोविंद गावडे स्वता कलाकार आसतना अशी घडणूक घडप हें दुर्दैवी. मुख्यमंत्र्यान ह्या प्रकरणाची पुराय चवकशी करची.
– अमीत पालेकार, राज्य संयोजक, आप
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
