भांगरभूंय | प्रतिनिधी
वल्लभ पै : सल्लागारांक दोन दिसांत अहवाल सादर करपाची सुचोवणी
भांगरभूंय । प्रतिनिधी
पणजी : कला अकादमी संबंदांत गोंय सरकारान स्थापन केल्ल्या कृतीदलाची बसका 8 मेक जातली. ते आदीं भौशीक बांदकाम खात्यान (पीडब्ल्यूडी) कृतीदलाचे सुचोवणे प्रमाण नाटकघरांतली आवाज वेवस्था, उजवाड वेवस्था आनी रंगमाचये संबंदांत नेमिल्ले तिनूय सल्लागार अहवाल सादर करतले. ह्या अहवालांतल्या शिफारशीं विशीं 8 मेक आपयल्ले बसकेंत चर्चा जातली, अशी म्हायती पीडब्ल्यूडीचे अभियंते वल्लभ पै हांणी शुक्रारा ‘भांगरभूंय’ कडेन उलयतना दिली.
नुतनीकरण केल्ल्या कला अकादमीच्या नाटकघरांतले आवाज वेवस्थेंत, उजवाड वेवस्थेंत आनी रंगमाचये मदीं उणाव आसात. ताचो मार थंय सादर जावपी नाटकांच्या प्रयोगाक बसका, असो दावो नाटक मळा वयले गोंयांतले तज्ञ आनी विरोधकांनी केला. हाचे वयल्यान सरकार तशेंच मंत्री आनी कला अकादमीचे अध्यक्ष गोंविंद गावडे हांचेर टिका जावपाक सुरवात जाले उपरांत सरकारान विजय केंकरे हांचे अध्यक्षते खाला 13 वांगड्यांचो कृतीदल स्थापन केलो. ह्या कृतीदलान पयलेच बसकेंत उणाव आशिल्ल्याचें मान्य करून नाटकघरांतली आवाज वेवस्था, उजवाड वेवस्था आनी रंगमाची संबंदांत तीन सल्लागार नेमपाची सुचोवणी पीडब्ल्यूडीक केल्ली. ते प्रमाण पीडब्ल्यूडीन आवाज वेवस्थे खातीर रॉजर ड्रेगो, उजवाड वेवस्ते खातीर शितल तळपदे आनी रंगमाचये खातीर राजन भिसे हांची नेमणूक केल्या. ह्या तिनूय सल्लागारांक दोन दिसांत अहवाल सादर करपाची सुचोवणी केल्या. तांच्या अहवालांतले शिफारशीं संबंदांत बसकेंत चर्चा जातली, अशें पै हांणी सांगलें. मजगतीं, मूळ कंत्राटांत ज्यो तजविजी आशिल्ल्यो, त्यो पुराय जावंक नात आनी त्योच तजविजी सल्लागारांनी सुचयल्यात, जाल्यार मूळ कंत्राटदारा कडल्यान तीं कामां करून घेतले. सल्लागारांनी नव्यो गजाली सुचयल्यो जाल्यार त्यो मात सरकार स्वता पयशे मोडून पुराय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
