भांगरभूंय | प्रतिनिधी
पणजी: कला अकादमीच्या मुद्याचेर कला राखण मांड-गोंय हे माचयेक तेंको दिवन विरोधी पक्ष फुडारी युरी आलेमाव हांणी शुक्रारा सांगलें, सरकारान निकृश्ट आनी डुप्लिकेट उपकरणां बदलपा खातीर अतिरिक्त निधी खर्च करचो न्हय.
कला अकादमीच्या नुतनीकरण प्रक्रिये विशीं श्वेतपत्रिका काडपाची मागणी करपी निवेदन कला राखण मांड हांणी बिरेस्तारा मुख्यमंत्री कार्यालयाक सादर केलें. ताचेर प्रतिक्रिया दितना आलेमाव हांणी सांगलें, कला अकादमीच्या नुतनीकरणा खातीर करदात्यांचे पयशे वापरता. ताका लागून मुख्यमंत्री डॉ. प्रमोद सावंत हांणी श्वेतपत्रिका काडप गरजेचें.
मुख्यमंत्री प्रमोद सावंत हांणी कला अकादमीच्या दुरुस्तीच्या कामाचो आढावो घेवपाक आनी सुचवण्यो मेळपा खातीर कलाकारां सयत एक समिती बेगोबेग काडची. सरकारान कलाकारांचो आदर करप गरजेचें. हे कलाकार आमच्या राज्याक अभिमान मेळोवन दितात आनी आमची कला आनी संस्कृती राखतात, अशें आलेमाव हांणी म्हणलें.
मुख्यमंत्री सावंत हांणी ह्यो मागण्यो पुराय करच्यो. जर ते अपेशी जाल्यार न्याय मेळोवपा खातीर ही संस्था जें पावल उबारतलें ताका कॉंग्रेस पक्ष फाटबळ दितली, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
