भांगरभूंय | प्रतिनिधी
पणजीः कला अकादमीच्या कोसळिल्ल्या उक्त्या सभाघरांची अजून मेरेन दुरुस्ती जांवक नाशिल्ल्यान कला राखण मांडान एक वेगळे पद्दतीन आंदोलन करून सरकाराचो निशेध केलो. कला राखण मांडाच्या वांगड्यांनी सभाघराचे माचयेर वचून सभाघराक फुलां घालून आर्गां ओंपलीं आनी सरकाराक बुद्द दिवपाची प्रार्थना केली.
कला अकादमीचे उक्तें सभाघर कोसळून दोन वर्सां जालीं. पूण अजून मेरेन ताची दुरुस्ती जावंक नाशिल्ल्यान कला राखण मांडान सरकाराचो निशेध केलो. कला राखण मांडान शोकसभा घडोवन हाडली आनी ह्या सभाघराचो दुसरो स्मृतीदीस पाळ्ळो. ह्या वेळार कलाकारांनी सभाघराचे माचयेक फुलां ओंपून आर्गां ओंपलीं.
हे विशी उलयतना कला राखण मांडचे अध्यक्ष देविदास आमोणकार हांणी सांगलें, दोन वर्सां जावन गेलीं अजून मेरेन उक्त्या सभाघराची दुरुस्ती जायना ही खंतीची गजाल आशिल्ल्यान आमी स्मृतीदीस पाळ्ळो.
हे माचयेर पुराय गोंयभर कलाकार तयार जाले आनी संवसारभरांतले कलाकार हे माचयेरे कला सादर करून गेले. देखून कलाकार म्हूण म्हजे काळीज भरून येता. ह्या सभाघराक लागून पोरूं वर्सा आमी कला अकादमी भायर रडले. तरी पूण सरकारान आमचे दुख्ख आयकूंक ना असो आरोप आमोणकार हांणी केलो.
ह्या सभाघराचो दुसरो स्मृतीदीस आसा. देखून हांव मागतां सरकाराक देवान बरी बुद्द दिवची. एक बरी सुसज्ज अशी माची उपलब्ध करून दिवची आनी तिसरो स्मृतीदीस पाळपाची परिस्थिती हाडची न्हय. सरकाराक ही परंपरा चलोवपा खातीर बरी बुद्द दिवची, असो उलो आमोणकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
