भांगरभूंय | प्रतिनिधी
गोंय कला अकादमीतल्या ओपन एअर थेटराची बांदावळ बेगीन जावंक शकता. ते खातीर मुळावे प्लॅन कला अकादमीचे आदले
उपाध्यक्ष आर्किटेक्ट सुशांत खेडेकार दाखोवं शकतात. त्या थेटरा वांगडा फाटलें तुटिल्लें, मोडिल्लें पांखें रोखडें सारकें करात. तें नवे कला अकादमीची बुन्यादय जावंक शकता. राजपाटणात कला अकादमीक नवी सुवात सोदपाक आरंभ करचो. कांपाल वाॅक वे बुडपी पणजेक वाटायतलो, परशुरामाची सया ताचेर आसा. लागसल्ल्या रानां खात्याचे वखदी नर्सरींतल्यान ग्रीन लंग्ज (वारें हाडपी घरां) कला अकादमीक नवे वाटेर व्हरतलीं. आशिल्ले कला अकादमीचेर चड खर्च करचो न्हय, कलेच्या मळार येवपी, झगझगपी सानुल्या नखेत्रां खातीर पयसो सांबाळून दवरात.
राजपाटणांतल्यो पोन्न्यो बिल्डिंगो अंदूच्या पावसांत मुळा सावन पडच्यो नात हे खातीर जतनाय घेयात. उत्तर जिल्लो पावंड्यार, राजपाटणांतले जिल्लोधिकारी कचेरेचे बिल्डिंगेचेर मात्शी एक नदर मारल्यार बरें. मासान द आमोरी शाळा आनी लागसल्ल्यो बिल्डिंगो जिल्लोधिकाऱ्यांनी पळोवप समा जातलें. तांचेरय आतां चड खर्च ना करप बरें. ते सुवातींत एकादरे सरकाराक नवे कला अकादमी पासत सुवात मेळटली.
एके शिरगांव जात्रेच्या खेटाखेटीच्या रिपोर्टाची देख घेवन कला अकादमीच्या समितीचोय रिपोर्ट आयलो. फुडारांत येवपी स्ट्रक्चरल आॅडिट रिपोर्टांतल्यान सध्याचे कला अकादमीक पडिल्ले बुराक, लायिल्ल्यो धिगयो दिसच्यो नात. कला अकादमीत भितर सरतना फुलिल्लें गुलमोहराचें झाड थाकाय दिवपी, पावस बेगीन येता असो संदेश धाडपी. कला अकादमींत, अकादमीचे देगेर कितें आसा? झाडां कसलीं आसात? मांडवीची देग बदलल्या? कला अकादमीक सरभोंवतणच्या काँक्रिटाचो, बदलपी पर्यावरणाचो धपको बसता? पर्यावरणाच्या इंजिनियरिंग नदरेन अभ्यास जावचो. तो मेरेन कला अकादमी सुदारपा पासत चड खर्च नाका.
कला अकादमींतल्या दीनानाथ मंगेशकर सभाघरांतले दोश समितीन दाखोवन दिल्यात. कला अकादमीचेर ‘भांगरभूंय’ दिसाळ्यांत बरयिल्ल्या एका लेखा प्रमाण मंगेशकर सभाघर सिनेमाची माची म्हण उपेगी. वर्सभर सिनेमाचे उत्सव जायत व्हय? नाटकांय सिनेमा, टिव्हीचे वाटेन वतना डझनभर गोंयकार सिनेमा दिग्दर्शक, निर्माते, लेखक, संवाद लेखक घडल्यात. तेय मनरिजवणेची नवी माची म्हणून सिनेउत्सवी अकादमीक तेंको दिवंक शकतात. गोंया भायले तर गोंय म्हणल्यार एका पायांर तयार. गोंयां भायल्या गोंयकारांची घरां सिनेमा शुटिंग थळा जाल्यांत व्हय?
2025 च्या गोंय इफ्फीची जायरात जातना गोंय राज्य सिनेमा उत्सव आषाढ पावळे बराबर जावचो. पणजे, पर्वरे आयनाॅक्स एक दोन थेटरां प्रादेशिक सिनेमा पासत मेळटलीं. पाटो प्लाझार जावपी नव्या सिने मल्टीप्लेक्सांत ड्रायव्ह इन थिएटर आसत व्हय? मडगांव रवींद्र भवनाकय इफ्फीचें थळ करपा पासत बुन्यादी वावर सुरु जाला. 2027 त 27 मतदारसंघ जिखपाचे ते येत्न. कलामोगी धादोशी जाल्यार गोंय, गोंयकार, सरकाराक धादोसकाय मेळटली. मडगांव रवींद्र भवन दक्षिणेंतल्या हेर रवींद्र भवनांक जोडल्यार, कान फिल्मोत्सवांतल्यान जायरात करची पडटली. गोंया भायले, गोंयकार सिनेमा कलाकार, तंत्रज्ञांक, लेखकांक, गीतकार, प्रतिनिधींक रावपाची जेवपाची वेवस्था लागसार जावची. उमेद वाडोवपी नवीं ल्हारां (वेव्हज) येवपाचीं आसात.
सिनेमाचो म्हाकुंभ इफ्फींतल्यान गोंयांत आयलो, अंदूय ल्हारांर ल्हारां कला अकादमींतल्यान इफ्फीच्या मुखेल थळार येतलीं. कला अकादमी भायल्यो पासयो इफ्फी 2025 आदीं सारक्यो जावपा पासत आंदोलन कित्याक? विचार परगटावन, फट्यांतल्यान दाखोवन दिवया खंय सुदारप जाय तें. सकारात्मक विचारांतल्यान सरकार जागें जाता. कला अकादमी पावसांत भिजपा पासून वाटावता हें सत सांगपाची धिटाय दाखोवपाची संद आसा, अंदू गोंय विधानसभेच्या पावसांतल्या अधिवेशनांत कला अकादमीच्या प्रस्नांक जापो दितना.
कला अकादमी, जुंता हावस राजपाटण पणजेतलीं म्हत्त्वाचीं शासकी थळां. 75 वर्सां आदीं इतिहासांत कशीं वचूंक शकतात? कला अकादमीचो इतिहास बरोवपाचो वावर अकादमीचे आदले सचीव पांडुरंग फळदेसाय वेगळे पद्धतीन मांडपाक मजत करत व्हय? कलेच्या इतिहासा इतलेंच कलेचें शिक्षणय म्हत्वाचें आसा. कलेक उंचायेर, देस आनी देसा भायर व्हरपी नाटकांचे सिनेमा करपाक शिकोवपी आसतले. गरज आसा बऱ्या स्टुडिओंची, तंत्रज्ञ आनी तंत्रज्ञानाची. राजभासेंतल्यान उंचेले तांकीच्या नाटकां, सिनेमाचें लिखाण करपाची.
कला अकादमी वेवसायीक पद्धतीन चलतना नेमावळींत केल्ले बदल, नवीं दारां, उगत्या सुवातींतलीं थेटरां आनी थेटरा भायर गांवां गांवांतल्या देवळांचे माचयेर फुलपी कला घरांतय फळादीक जाता. मनरिजवणेच्या नव्या घरांक, दारांक एके माचयेर व्हरपी ल्हारां आयनाॅक्साच्या आंगणांत 2024 च्या इफ्फींत खेळटालीं. त्या ल्हारांचो गडगड, चकचक, ग्लॅमर 24 कित्याक 48 वरांय आसूंये. 2025 ची इफ्फीचे माचयेर ल्हारांतलें रंगयाळें गोंय दाखोवपा पासत कोण जागतले? सर्त कोणाची? इव्हेंट मॅनेजमेंट कंपनी फाटल्या 20 वर्सांनी कितल्यो जाल्यो, तिगल्यो? नियाळ जावचो. कला अकादमींतल्या नाटक, गायन, नाचाच्या मळार ल्हारां खंय पावल्यांत? तें कला आनी संस्कृती खात्याच्या नियाळांतल्यान कळचें.
कला अकादमीचें ओपन एअर थेटर भुरग्यां पासत नाटकुल्यांची निर्मणी करपाक उपेगाक हाडूंक मेळचें. नाटकां, सिनेमा परस गॅदरिंगां, भासाभासेच्यो, हेर उत्सवांच्यो कार्यावळी त्या थेटरांत जावच्यो. उत्सवी जीण म्हणल्यार गोंयचे कलेचे फकत एक आंग. तेच जिणेंत बरें वायट आसतलेंच. तें काणयेच्या रुपांनी, खिस्ती खिस्तींनी संस्कृतीरुपी कलेतल्यान समेस्तां मुखार आयल्यार बदलपी समाजमन दिसतलें. बदलत वचपी समाजमनांत पळोवपाची तांक बुद्धीमतेक आसता. कला अकादमीतल्या शिक्षणाक नव्या तंत्रगिन्यानाची जोड मेळ्ळ्यार बुद्धिमताय बळिश्ट जातली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
