भांगरभूंय | प्रतिनिधी
पणजीः कला अकादमी विशीं गठीत केल्ल्या कृती दळान कला अकादमीचें बांदकाम ऑडीट करपाचे मागणेक चार्ल्स कुर्रेय्या फांवडेशनान तेंको दिला. कला अकादमीचे उक्तें सभाघर कोसळ्ळें उपरांत बांदकाम सुरक्षे विशीं गंभीर प्रस्न उप्रासल्यात. देखून हाचें बांदकाम ऑडीट जावप गरजेचें अशें चार्ल्स कुर्रेय्या फांवडेशनान म्हणलां.
हालींच जाल्ले कला अकादमीच्या कृती दळाचे बसकेंत आयआयटी मद्रासची तज्ञ समिती नेमून कला अकादमीच्या बांदकामाचें ऑडीट करपाचें थारावन ही मागणी पुराय करपा खातीर मुख्यमंत्री डॉ. प्रमोद सावंत हांची भेट घेवपाचें थारायिल्लें.
बुधवारा चार्ल्स कुर्रेय्या फांवडेशनान पत्र काडून कृती दळान केल्ली कला अकादमीच्या सद्याच्या स्थितीच्या बांदकामाचें ऑडीट करपाचे मागणेचें समर्थन केल्लें.
बांदकामाचें ऑडीट करपाची ही गरजेची मागणी आमी सुरवेच्यान करीत आयिल्ले. फाटल्या कांय काळांत जीर्ण जायत वचपी इमारत आनी दुरुस्ती वेळार ताचो काय भाग कोसळप हाचे वेल्यान ऑडीट जावप गरजेचें हें दिसून येता. ह्या ऑडिटाक लागून इमारतीची घटाय निश्चीत जावची ना जाल्यार सामान्य लोकांचे सुरक्षेचे नदरेन म्हत्वाचें थारतलें.
हे विशीं तज्ञ आनी पोरण्या शिमिटाची म्हायती आशिल्ले आयआयटी मद्रास हांचे कडल्यान हें ऑडीट बेगीन जावचें अशी आमची मागणी आसा. आमकां आस्त आसा की ह्या इमारतीच्या पुर्नस्थापने खातीर सरकार फावो ती उपाय येवजण हातांत घेतले अशें चार्ल्स कुर्रेय्या फांवडेशनाचे वेवस्थापकी ट्रस्टी आर्मेरीयो रिबेरो हांणी पत्रा वरवीं सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
