भांगरभूंय | प्रतिनिधी
भांगरभूंय । खबरां मेज
पणजीः स्वस्तिक- पणजी आयोजीत आनी फोमेंतो प्रस्तुत 12 वो स्वरमंगेश- मा दिनानाथ मंगेशकार यादस्तीक संगीत समारोह 8 ते 10 डिसेंबर मजगती पणजेच्या कला अकादमीच्या दीनानाथ ंमंगेशकार सभाघरांत जातलो. फाटल्या 11 वर्सां सावन सुर, ताल, नाच आनी वादन अशा कलांचो अविश्कार घडोवपी व्हो संगीत महोत्सव म्हणल्यार रसिकां खातीर एक खोशयेचो उत्सव आसता.
पद्मभूषण बेगम परवीन सुलताना, पं, रोनू मजुमदार, पं. तरुण भट्टाचार्य, पं अक्रम खान, पं उल्हास कशाळकार, पं. बुधादित्य मुखर्जी, पं रघुनंदन पणशीकार, गौरी पाठारे हांच्या सयत देश पांवड्या वयले तेरा कलाकार महोत्सवांत आपले कलेचो अविश्कार दाखयतले. मुख्यमंत्री डॉ प्रमोद सावंत हांचे हस्तुकीं शुक्रार 8 डिसेंबराक महोत्सवाचें कला आनी संस्कृती मंत्री गोविंद गावडे आनी पर्यटन मंत्री रोहन खवंटे हांचे उपस्थितींत उक्तावण जातलें. पुण्यातले नामनेचे प्रवचनकार डॉ संजय उपाध्ये ह्या वेळार मुखेल सोयरे म्हणून हाजीर रावतले. ह्या वेळार स्वरमंगेश हे स्मरणिकेचें प्रकाशन जातलें. तातूंत गोयचें साहित्य, संगीत, लोक संगीताचेर लेख आसता.
8 डिसेंबराक सांजे 4.30 वरांचेर राजन माशेलकार हाच्या व्हायोलिन वादनान महोत्सवाक सुरवात जातली. उपरांत संवसारीक नामनेची गायिका पद्मविभूशण बेगम परवीन सुलताना हांचे शास्त्रीय गायन जातलें. तांका मुकुंदराज देव तबल्यार आनी श्रीनिवास आचार्य संवादिन साथ करतले. शेनवार 9 डिसेंबराक सांजे 4.30 वरांचेर कोलकाता हांगचो तरणाटो गायक आनी पं अजय चक्रवर्ती हांचो शिश्य अनुभब खामरू हाच्या गायनाची मैफल जाली. उपरांत नामनेचे सतार वादक पद्मभूशण बुधादित्य मुखर्जी हाचें सतार वादन जातलें. ताकां तबल्याचेर कोलकाता हागचे सौमन नंदी साथसंगत करतले. दुसऱ्या दिसाचो समारोप गानसरस्वती किशोरीताई आमोणकार हांचो शिश्य पं. रघुनंदन पणशीकर हाच्या गायनान जातली.
आयतार 10 डिसेंबराक महोत्सवाची सुरवात सकाळी 9.15 वरांचेर दत्तगुरू केळकार हाच्या गायनान जातली. उपरांत कोलकाता हांगच्या देबप्रिया अधिकारी आनी समन्वय सरकार हांची सतार आनी गायनाची जुगलबंदी जातली. पं. रोमू मजुमदार आनी पं. तरुण भट्टाचार्य हांच्या बासरी आनी संतूर जुगलबंदीन सकाळच्या सत्राचो समारोप जातलो. सांजे 4.30 वरांचेर महोत्सवाच्या निमण्या सत्रांची सुरवात मुंबयच्या गौरी पाठाऱे हिच्या शास्त्रीय गायनान जातली. तिका तबल्याचेर दयेश कोसंबे आनी संवादिनीचेर सुभाष फातर्पेकार साथसंगत करतले. उपरांत दिल्ली घराण्याचे तबलें वादक उस्ताद अक्रम खाँ हांचे तबला वादन जातलें. तांका संवादिनीचेर पुणे हांगचो मिलिंद कुलकर्णी करतलो. ह्या 12व्या स्वरमंगेश संगीत महोत्सवाचो समारोप ग्वाल्हेर घराण्याचे गायन पद्मश्री उल्हास कशाळकर हांचे मैफलीन जातलो. पुराय महोत्सवाचें सूत्र निवेदन गोविंद भगत आनी हेतल गंगानी करतले.
ह्या महोत्सवाचे मुखेल प्रायोजक फोमेतो उद्देग समूह आसा. कला अकादमी, गोंय सरकराचें संस्कृती खातें, पर्यटन खातें, भारत सरकार, आयसीसीआर हांचो मुखेल पालोव आसा. राजदीप बिल्डर्स, ओएनजीसी, सॉल दी गोवा, हॉटेल क्रावन, हॉटेल काम्पाल, हॉटेल कॅपिटॉल, एमआयटी पुणे, व्हिजन धेंपे, आयव्हीएप, धेपे समूह, वेदांता, चौगुले इंडस्ट्रीस हांचे महोत्सवाक मोलाचें सहकार्य मेळ्ळां. महोत्सवा वेळार पुस्तक आनी संगीत वाद्यांचे प्रदर्शन आयोजीत करतले अशें स्वस्तिकाचे अध्यक्ष डॉ प्रवीण गांवकारान सांगलें. व्हो महोत्सव सगल्यां खातीर उक्तो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
