भांगरभूंय | प्रतिनिधी
माचये वयले लायटीचे आडखळीक लागून अभिनेते शरद पोक्षे हांचो निर्णय
भांगरभूंय । प्रतिनिधी
पणजी : कला अकादमीच्या नाटकघरांतले माचये वयले लायटींत तंत्रीक बिघाड जाल्ल्यान ताचो मार आयतारा अभिनेते शरद पोंक्षे हांच्या ‘पुरुष’ नाटकाच्या प्रयोगाक बसलो. नाटकाचो प्रयोग चालू आशिल्लो. माचयेर शरद पोंक्षे भुमिका साकारतालो, त्या वेळार माचये वयले लायटींत तंत्रीक बिघाड जालो. ताका लागून ’10 मिण्टां खातीर पड्डो उडयता आनी परतून येता’ अशें सांगून तांणी मदींच प्रयोग थांबयलो. ह्या प्रकाराक लागून कला अकादमी परतून एकदां चर्चेंत आयल्या. नामनेचे अभिनेते शरद पोंक्षे हांच्या ‘पुरुष’ नाटकाचो प्रयोग आयतारा कला अकादमींत आशिल्लो. नाटकाक प्रेक्षकांचो उत्स्फूर्त प्रतिसाद मेळिल्लो. पूण नाटकाचो प्रयोग सुरू जाले उपरांत पोंक्षे अभिनय करतना नाटकघराच्या उजवाड येवजणेंत तंत्रीक बिघाड जालो. ताचो परिणाम पुराय नाटकाचेर जावचो न्हय, हे खातीर पोंक्षे हांणी स्वता जावन प्रयोग थांबोवपाचो निर्णय घेतलो. ’10 मिण्टां खातीर पड्डो उडयता आनी परतून येता’ अशें म्हणीत तांणी तांणी प्रेक्षकांचो निरोप घेतलो. ह्या प्रकाराक लागून नाटक पळोवपाक आयिल्ल्या रसिकां मदीं सुमारा भायर निरशेवणी पातळ्ळी.
शरद पोंक्षे हांच्या नाटकाच्या प्रयोगा वेळार कला अकादमीच्या नाटकघरांत माचये वयले लायटींत बिघाड जाल्ल्याची म्हायती मेळटाच आपणे तंत्रीक पंगडाक थंय धाडलो. ते संबंदांत सविस्तर अहवाल सादर करपाची सुचोवणी लेगीत आपणे ह्या पंगडाक केल्यात. अहवाल मेळ्ळे उपरांतूच फुडलो निर्णय घेतले.
गोंयांतल्या नामनेच्या कला अकादमीच्या नाटकघराक वेवस्थापकूच नासप ही दुर्दैवी गजाल. आमच्या नाटकाच्या प्रयोगा वेळार माचये वयले लायटींत बिघाड जाल्ल्यान उजवाड येवजणेचो खेळ रसिकांक पळोवपाक मेळूंक ना. मुख्यमंत्री डॉ. प्रमोद सावंत हांणी हातूंत लक्ष घालून कला अकादमीच्या नाटकघराची स्थिती सुदारची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
