भांगरभूंय | प्रतिनिधी
पणजी : फाटल्या कांय दिसां सावन कला अकादमींत आवाज आनी उजवाड येवजणे विशीं आमी आयकतात. पूण, आवाज, उजवाड सगळें वेवस्थीत आसा. नामनेचे अभिनेते मनोज जोशी हांणी आपल्या ‘चाणक्य’ नाटका वेळार आपणाक कसलेच त्रास जाणवले नात अशें सांगलें. उपरांत कला अकादमीचो विशय परतून एकदा चर्चेक आयला.
कांय दिसां आदीं कला अकादमींत अभिनेते शरद पोंक्षे हांच्या ‘पुरुष’ नाटकाचो प्रयोग जालो. प्रयोग चालू आसतना आनी पोंक्षे अभिनय करता आसतना उजवाड वेवस्थेंत त्रुटी जाणवल्यो. देखून पोंक्षे हांणी “धा मिण्टां पड्डो बंद करून परत येता” अशें सांगून नाटक मध्यांतराक थांबयल्लें. ताका लागून विरोधी आमदारांनी कला अकादमीचेर सरकार आनी मंत्री आनी कला अकादमीचे अध्यक्ष गोविंद गावडे हांचेर टिका केली. हे तंत्रीक गडबडीचेर स्वता पोंक्षे हांणी आपलें मत उक्तायतना गोंयांतल्या नामनेच्या कला अकादमीच्या नाट्यगृहाक वेवस्थापक नासप हे दुर्दैवी अशें म्हणलें. आमच्या नाटकाच्या प्रयोगा वेळार उजवाड यंत्रणेंत तंत्रीक त्रुटी जाल्ल्यान प्रेक्षकांक उजवाड वेवस्था कृतींत पळोवंक मेळ्ळी ना. मुख्यमंत्री डॉ. प्रमोद सावंत हांणी व्यक्तिगत रितीन हातूंत लक्ष घालचें अशें तांणी म्हणिल्लें.
पूण अभिनेते जोशी हांणी मात आपल्या ‘चाणक्य’ नाटकाच्या प्रयोगा वेळार कसलीच समस्या जाणवंक ना, अशें सांगलें. दोन नामनेच्या अभिनेत्यांनी उक्तायिल्ल्या विभिन्न मतांक लागून गोंयकार नाट्य रसिकां मदीं कला अकादमी विशीं प्रस्नचिन्न उपस्थीत रावलां.
……………………………
मनोज जोशी हांणी कितें म्हणलें …
– कला अकादमींत आवाज आनी उजवाड येवजणे विशीं आमी कांय गजाली आयकिल्ल्यो. पूण ‘चाणक्य’ नाटकाच्या प्रयोगा वेळार ह्यो गजाली वेवस्थीत आशिल्ल्याचें आमकां दिसलें.
– कला अकादमींत ‘चाणक्य’ सादरीकरणाच्या वेळार प्रेक्षकांचो बरो प्रतिसाद मेळ्ळो.
– कला अकादमींत नाटक सादर करपाक आपणाक सदांच खोस जाता. ते खातीर अकादमी वेवस्थापनाचे तांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
