भांगरभूंय | प्रतिनिधी
नाटककार, दिग्दर्शक, कलाकारांची मागणी; स वर्सां आसा बंदपणजीः गोंयांतल्या नाट्य कलाकारांचो आलाशिरो आशिल्ली रिपर्टरी कंपनी (रंगमेळ) फाटलीं स वर्सां बंद आसा. नाटक मळार फुडार घडोवपाक सोदपी नवोदीत कलाकारांचेर ताचो व्हड परिणाम जावपाक लागला. देखून वरिश्ठ नाटककार आनी दिग्दर्शक अविनाश च्यारी आनी सतीश गवस हांणी बुधवारा ‘भांगरभूंय’ कडेन उलयतना कला अकादमीन बेगिनांत बेगीन ही कंपनी सुरू करची अशी मागणी केली.
ह्या संदर्भांत उलयतना अविनाश च्यारी हांणी म्हणलें, ‘नॅशनल स्कूल ऑफ ड्रामान दिल्लींत रिपर्टरी कंपनी सुरू करून नाट्य कलाकारांक आपली कला दाखोवपाची माची उपलब्ध केल्या. तशीच कला अकादमीनय 1991 वर्सा राज्यांत अशी रिपर्टरी कंपनी सुरू केली.” सुरवेच्या काळांत वसंत जोसलकार आनी गणेश उर्फ सुरेश मराठे हांच्या फुडारपणा खाला ही कंपनी फुल्लीं. त्या काळांत नाटक शाळेंत तीन वर्सांचो अभ्यासक्रम पुराय केल्ल्या जायत्या जाणांनी रिपर्टरी कंपनींत येवन स्वताक सिध्द केले. रिपर्टरी कंपनींत 15 पदां आशिल्लीं. तातूंतली धा सुवातो नाटक शाळेंतल्यान येवपी लोकांक आनी पांच सुवातो प्रशिक्षण घेवंक नाशिल्ल्या कलाकारां खातीर मेळटाल्यो. ते प्रमाण तांकां ‘ब’ आनी ‘क’ ग्रेड दिवन पगार दिताले. तशेंच अतिरिक्त कलाकारांची गरज लागली जाल्यार ‘गेस्ट आर्टिस्ट’ आपयताले.
रिपर्टरी कंपनीचीं नाटकां त्या काळांत राज्यभर फामाद आशिल्लीं. देखून कलाकारांचे कलेक व्याप्ती मेळ्ळी. नवे कलाकार निर्माण जावपाक लागले. पूण विष्णू वाघ कला अकादमीचे अध्यक्ष जाले उपरांत तांणी रिपर्टरी कंपनीची संरचना बदल्ली. तांणी चड प्रमाणांत गेस्ट आर्टिस्ट घेवन नाटक करपाक सुरवात केली. ताका लागून हे कंपनीचो उद्देशूच नश्ट जालो. मजगती, नाट्य विद्यालय बंद पडलें अानी कॉलेज ऑफ थिएटर आर्टस सुरू जालें. आनी रिपर्टरी कंपनी बंद पडली, अशें च्यारी हांणी सांगलें.
आतां नाटकाची शाळा ना. ताचे बदला नाट्य कला महाविद्यालयाची थापणूक जाल्या. त्या विद्यार्थ्यांक लेगीत रिपर्टरीची गरज आसा. देखून कला अकादमीन रिपर्टरी कंपनी परतून सुरू करची आनी कलाकारांक उर्बा दिवची, अशें च्यारी हांणी नदरेक हाडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
