भांगरभूंय | प्रतिनिधी
मुख्यमंत्रीः मनशाक मनीसपण शिकोवपाचो कलाकारांक उलो
भांगरभूंय । प्रतिनिधी
पणजीः गोंयांत बरे कलाकार तयार जावचे ही आमची अपेक्षा आसा. हे खातीर सरकार गोंयांतल्या कलाकारांक वेळावेळार आदार दिता. अशें आसलें तरीय मनशाक मनीसपण शिकोवपाचें, ताका साहित्य आनी कले कडेन जोडपाचें काम हें कलाकारांचें आसा. कलाकारांनी हॅपीनेस इंडेक्स वाडोवपाचो यत्न करचो. युवा कलाकारांनी ज्येश्ठ कलाकारां कडल्यान शिकप गरजेचें आसा. तरणाट्यांनी आपली नोकरी, वेवसाय सांबाळून गोंयांतले कलेची वाड करची, असो उलो मुख्यमंत्री डॉ. प्रमोद सावंत हांणी मारलो.
शेनवारा पणजे राज्य सांस्कृतीक पुरस्कार भेटवण सुवाळ्यांत मुख्यमंत्री उलयताले. ह्या वेळार कला आनी संस्कृती मंत्री गोविंद गावडे, आमदार आलेक्स रेजिनाल्ड, कला संस्कृती खात्याचे संचालक सगूण वेळीप, कमलाकर म्हाळशी, चित्रपट निर्माते- दिग्दर्शक महेश कोठारी हाजीर आशिल्ले.
गोंयांतल्या थळाव्या कलाकारांक संद दिली जाल्यार गोंयांत मराठी चित्रपट निर्मिती खातीर येवजण सुरू करपाचो विचार करतले. गोंयांत कोंकणी चित्रपट निर्मिती खातीर गोंय मनरिजवण समस्थे वतीन मजत दितात. गोंयांत मराठी नाटक, चित्रपटांत काम करपी खूबशे कलाकार आसात. तांचे खातीर सरकार काम करता. अश्या थळाव्या कलाकारांक संद दिली जाल्यार गोंया भायल्यान गोंयांत शुटींग वा निर्मिती खातीर येवपी मराठी चित्रपटां खातीर लेगीत अशी येवजण सुरू करपाचो आमी विचार करतात, अशें मुख्यमंत्री डॉ. सावंत हांणी सांगलें.
गोंयांतली भजन, नाटक परंपरा गिरेस्त आसा. फाटलीं कितलीशींच वर्सां गोंयांतल्या कलाकारांनी ही परंपरा सांबाळून दवरल्या. देसांत आनीक खंयच जावंक ना असो सांबाळ गोंयांत जाला. देश पांवड्याचेर भजन सर्ती जाल्यो जाल्यार गोंय पयलो नंबर मेळयतलें. मराठी नाटक सर्ती जाल्यो जाल्यार गोंय निश्चीत पयल्या तीन नंबरांनी येतलें, हाची आपल्याक खात्री आसा. तियात्र कलाकारांनी गोंयचें नांव संवसारीक पांवड्याचेर व्हेलां, अशें मुख्यमंत्री डॉ. सावंत हांणी सांगलें.
गोंय विदेशा वरीं जालाः महेश कोठारे
आपूण आदीं गोंयांत शुटिंगे खातीर येतालों. तेन्नाचें गोंय आनी आतांचें गोंय हाचे मदीं खूब बदल जाला. गोंयांत व्हड उड्डाण पूल बांदल्यात. गोंयचे रस्ते लेगीत सुंदर आसात. आयज गोंयांत आयले उपरांत आपल्याक विदेशांत आयिल्ले वरी दिसलें, अशें महेश कोठारी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
