भांगरभूंय | प्रतिनिधी
अॅड. कार्लुस फेरेरा: ‘धोल म्हज्या बाय’ नाटकाचो जालो शुभारंभ
म्हापशें: नाट्य कलाकारांक आतां राज्यांत मान मेळपाक लागला. कलाकारांनी कलेंत आपली तांक सिद्ध करून स्वता मुखार सरून नांव जोडचें, असो उलो हळदोणाचे आमदार अॅड. कार्लुस फेरेरा हांणी मारलो.
हळदोणा हांगच्या श्री सांतेरी मंदीर सभाघरांत मैत्री क्रिएशन प्रस्तूत ‘धोल म्हज्या बाय’ ह्या नव्या कोंकणी नाटकाचो म्हुर्त सुवाळो आमदार फेरेरा हांचे हस्तुकीं जालो. हे कार्यावळीक ते मुखेल सोयरे ह्या नात्यान उलयताले.
येवपी चवथीक सावन ह्या नाटकाचे प्रयोग सादर जातले. ह्या वेळार काँग्रेस फुडारी प्रा. अमरनाथ पणजीकार, लेखक सुशांत नायक, देवस्थानाचे उपाध्यक्ष व्यंकटेश गांवठणकार, पुजारी अरविंद वझे, नितीन नायक, पंच वांगडी हरीष मयेंकार, प्रियदर्शन साळगांवकार, सुंदर कारबोटकार, अमीत शिंदे, मनोहर भोसले हाजीर आशिल्ले.
अॅड. फेरेरा हांणी फाटल्या वर्सा मैत्री क्रिएशनान ‘धांव धांव धावलो’ ह्या नाटकाची वेवसायीक माचयेर निर्मिती केल्ली. ह्या नाटकाची बरीच तुस्त तोखणाय जाली. तशेंच ह्या नाटकाचे सुमार 70 प्रयोग सादर जाले. तशेंच ह्या नव्या नाटकाकूय असोच प्रतिसाद मेळून शेंकडो मनयतले अशें म्हणून तांणी परबीं भेटयलीं.
थळाव्या कलाकारांचो आसपाव करून वेसायीक नाटक माचयेर देंवोवपाचें दिग्दर्शक समीर गडेकार हांणी दाखयल्लें धाडस, तशेंच नाटकांतल्या पात्रांची तोखणाय करून पुराय गोंयांत प्रयोग सादर करपा खातीर परबीं अमरनाथ पणजीकार, व्यंकटेश गांवठणकार आनी हेरांनी आपलें मनोगत उक्तायतना दिलीं.
कार्यावळीचें सुत्रसंचालन आनी उपकार समीर गडेकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
