भांगरभूंय | प्रतिनिधी
पणजी: जमनी रुपांतरण करपी कलम 39 ए रद्द करपाचे मागणे खातीर पणजे आझाद मैदानार आयज सांजे म्हाआंदोलन करपाचो निर्णय विरोधी पक्षांनी जाहीर केला. पुराय राज्यांतल्यान 5 हजारां वयर लोक एकठांय येतलो अशें काँग्रेस विधीमंडळ फुडारी युरी आलेमाव हांणी सांगलें. पाळे – शिरदोण प्रस्ना निमतान विरोधकांचो एकवट दिसून आयलो.
पाळे- शिरदोणच्या थळाव्यांनी कलम 39 अ खाला केल्लें जमीन रुंपांतरण (झोन चेंज) फाटीं घेवपाचे मागणे खातीर केल्लें आंदोलन आनीक खर जालां. ताका आतां विरोधी पक्षांचें फाटबळ मेळ्ळां. पाळे – शिरदोणच्या संबंदीत जमीन रुंपांतरणा फाटल्यान घेवपाच्या जाग्यार आतां रुपांतरणाचें कलम 39 अ रद्द करपाची मागणी आझाद मैदानार आयतारा सकाळीं जाल्ले बसकेंत केली. हाका लागून पाळे- शिरदोणच्या लोकांच्या आंदोलनाक आनीक बळगें मेळपा वांगडाच तांणी विस्तृत स्वरूप घेतलां. मजगतीं, विरेश बोरकार हाका शेनवारा फरफटत भायर काडपी पुलिसाक निलंबीत करपाची मागणीय बसकेंत जाली.
काँग्रेस विधीमंडळ फुडारी युरी आलेमांव, कार्लोस फेरेरा, गोवा फॉरवर्डाचे आमदार विजय सरदेसाय, आरजीपीचे मुखेली मनोज परब, आपचे आमदार वेंझी व्हिएगश, क्रुझ सिल्वा, प्रदेश काँग्रेस अध्यक्ष अमीत पाटकार आनी हेरांनी आझाद मैदानार हाजेरी लावन आंदोलनाक तेंको दिलो. मागण्यो मान्य जाय मेरेन उपोशण चालूच दवरपाचो निश्चेव आरजीचे आमदार विरेश बोरकार हांणी केला. बोरकार हांचे सयत आंदोलनकर्त्यांची भलायकी इबाडल्यार तांकां हॉस्पिटलांत व्हरपा खातीर एम्बुलन्सय आझाद मैदानार तैनात केल्या.
आयतारा रातीं सांत आंद्रेंचे आमदार विरेश बोरकार हांचे भलायकेची तपासणी जाली. तांचे भलायकी थीर आशिल्ल्याचें दोतोरांनी सांगलें.
97 टक्के जनतेक तोंड
दिवचे : अमीत पाटकार
वेळ आयल्यार सत्तरींतल्यान 45 हजार लोक आमी पणजे हाडपाक शकतात अशें नगरनियोजन मंत्री विश्वजीत राणे हांणी एके कार्यावळींत केलें. हाका प्रदेश काँग्रेस अध्यक्ष अमीत पाटकार हांणी सभेंत जाप दिली. 45 हजार लोक म्हणल्यार 3 टक्के जातात. गोंयची लोकसंख्या 15 लाख आसा. उरिल्ले 97 टक्के जनतेक तोंड दिवपाची तयारी मंत्री राणे हांणी दवरची, अशें पाटकार हांणी म्हणलें.
जेल भरो आंदोलन : युरी आलेमांव
कलम 39 अ रद्द करपा वांगडा आमदार विरेश बोरकार हांकां भायर काडपी पुलिसांक निलंबीत करिना जाल्यार जेल भरो आंदोलन करपाची शिटकाणी काँग्रेस विधीमंडळ फुडारी युरी आलेमांव हांणी दिली. विरेश बोरकार हे आमदार आसात. तांचे भलायकेची वासपूस करपाक सभापती गणेश गांवकार हांणी येवपाची गरज आशिल्ली. मात ते आयले नात, अशें युरी आलेमांव हांणी सांगलें.
2027 विरोधकांचे युतीची
गरज : वेंझी व्हिएगश
गोंय वाटावपा खातीर 2027चे वेंचणुकेंत विरोधी पक्षांची युती जावप ही गरज. पक्षान युतीची तयारी दाखयली ना जाल्यार युती गरजेची आशिल्ल्याचें आमी पटोवन दितले, अशें वेंझी व्हिएगश हांणी म्हणलें.
कलम 39 अ विशीं न्यायालयांत
निर्णय जातलो : विजय सरदेसाय
कलम 39 अ चो मुद्दो न्यायालयांत आशिल्ल्यान हाचेर न्यायालय निर्णय घेतलें. प्रादेशीक आराखड्याची रोखडीच कार्यवाही करपाची मागणी आमदार विजय सरदेसाय हांणी केली.
आंदाेलन रद्द जाय मेरेन सुरूच : मनोज परब
नगरनियोजन कार्यालयांतल्यान आमदार विरेश बोरकार हांकां ओडीत भायर काडपी पुलिसाक निलंबीत करचो अशी मागणी आरजीचे मुखेली मनोज परब हांणी केली. कलम 39 ए रद्द जाय मेरेन आंदोलन सुरूच उरतलें, अशी शिटकावणी तांणी दिली.
आमदार विरेश बोरकार जाले भावूक
आझाद मैदानार हांव ल्हान आसतना सुटके झुजारी आशिल्ल्या म्हज्या आज्या वांगडा येतालों. आझाद मैदान हें सुटके झुजारी आनी क्रांतीचे प्रतीक जावन आसा. ह्याच आझाद मैदानार आयज आमकां गोंय वाटावपा खातीर झूज दिवचें पडटा, अशें सांगताना विरेशाच्या दोळ्यांतल्यान दुकां आयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
