भांगरभूंय | प्रतिनिधी
पणजी : नगर नियोजन खात्याच्या वादग्रस्त कलम 39 (अ) खाला 5.43 लाख चौ. मीf. जमनीचो झोन बदल निश्चीत जाला. खात्या कडेन 39 (अ) खाला 64.5 लाख चौ.मी. जमनीचें सेटलमेंटांत झोन बदल करपा खातीर अर्ज आयिल्ले. तातूंतले 59.15 लाख चौ. मि. जमनीचे झोन बदल करपाच्या अर्जांचेर प्रक्रिया चालू आसा, अशी लेखी जाप नगर नियोजन मंत्री विश्वजीत राणे हांणी दिल्या.
विधानसभेच्या पटलार हळदोणेंचे आमदार कार्लुस फेरेरा हांणी विचारिल्ल्या प्रस्नाक लेखी जापेंत नगर नियोजन मंत्र्यान ही म्हायती दिल्या.
फाटल्या दोन वर्सांच्या काळांत 39 (अ) खाला नगर नियोजन खात्या कडेन जमनीचे झोन बदल सेटलमेंट क्षेत्रांत करपा खातीर 1363 अर्ज आयिल्ले. तातूंतल्या सुमार 167 अर्जांक मान्यताय मेळून 5,43,807 चौ. मि. इतले जमनीचे झोन बदल निश्चीत जावन ते सेटलमेंट म्हूण अधिसुचीत जाल्यात. जाल्यार 59,15,373 चौ. मि. सुवातीचे झोन बदलाची प्रक्रिया चालू आसा.
सगल्यांत चड जमीन बदलाचे प्रस्ताव बार्देस, पेडणें आनी फोंडें म्हालांतल्यान आयल्यात. जाल्यार व्हड आकाराच्या जमीन बदलाचे प्रस्ताव दिवचल, तिसवाडी, साश्ट आनी मुरगांव म्हालांतल्यान आयल्यात. चडशे प्रस्ताव भात शेती, बागायती, लागवडी सकयली सुवात आनी सैमीक वाठार सेटलमेंटांत रुपांतरीत करपा खातीर आसात.
सगल्यांत व्हड 1.06 लाख चौ. मी. जमीन रुपांतर प्रस्ताव सर्वण- दिवचल म्हालांतल्यान आयला. जाल्यार दुसरे सुवातेर कोरगांव- पेडणें सावन 92,175 चौ. मि. बदलचो प्रस्ताव आनी तिसरे सुवातेर परतून सर्वण दिवचल सावन 68,399 चौ. मि. झोन बदलाचे प्रस्ताव आयला.
म्हाल पांवड्यार नियाळ घेतल्यार बार्देस म्हाल 18.5 लाख चौ. मि. जमीन रुपांतराच्या प्रस्तावा सयत सगल्यांत फुडें आसा. ताच्या फाटोफाट पेडणें म्हालांत सुमार 15.7 लाख चौ. मि. झोन बदलाचो प्रस्ताव आसा. जाल्यार दिवचल म्हालांत सुमार 8.9 लाख चौ. मि. आनी फोंडें म्हालांत सुमार 6.4 लाख चौ. मि. झोन बदलाच्या प्रस्तावांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
