भांगरभूंय | प्रतिनिधी
विरेश बोरकराक फरफटत भायर काडपी पुलिसांक निलंबीत करपाची मागणी
पणजी : पाळे- शिरदोणच्या थळाव्यांनी कलम ३९ अ खाला केल्ले जमीन रूपांतरण (झोन चेंज) फाटीं घेवपाचे मागणे खातीर केल्लें आंदोलन आनीक खर जालां. ताका आतां विरोधी पक्षांचें फाटबळ मेळ्ळां. पाळे – शिरदोणच्या संबंदीत जमीन रूपांतरणा फाटल्यान घेवपाच्या जाग्यार आतां रूपांतरणाचें कलम ३९ अ रद्द करपाची मागणी आझाद मैदानार जाल्ले बसकेंत केली. हाका लागून पाळे- शिरदोणच्या लोकांच्या आंदोलनाक आनीक बळगें मेळपा वांगडाच तांणी विस्तृत स्वरूप घेतलां. मजगतीं, विरेश बोरकार हाका शेनवारा फरफटत भायर काडपी पुलिसाक निलंबीत करपाची मागणीय बसकेंत केली.
काँग्रेस विधीमंडळ फुडारी युरी आलेमाव, गोवा फॉरवर्डचे आमदार विजय सरदेसाय, आरजीपीचे मुखेली मनोज परब, आपचे आमदार वेंझी व्हिएगस, प्रदेश काँग्रेस अध्यक्ष अमित पाटकार आनी हेरांनी आझाद मैदानार हाजेरी लावन आंदोलनाक तेंको दिलो. मागण्यो मान्य जाय मेरेन उपोशण चालूच दवरपाचो निर्धार आरजीचे आमदार विरेश बोरकार हांणी केला. बोरकार हांचे सयत आंदोलनकर्त्यांची भलायकी इबाडल्यार तांकां हॉस्पिटलांत व्हरपा खातीर ऍम्बुलन्सय आझाद मैदानार तैनात केल्या.
९७ टक्के जनतेक तोंड दिवपाचें केलें आवाहन
वेळ आयल्यार सत्तरींतल्यान ४५ हजार लोक आमी पणजे हाडपाक शकता, अशें नगरनियोजन मंत्री विश्वजित राणे हांणी एके कार्यावळींत केलां. हाका प्रदेश काँग्रेस अध्यक्ष अमित पाटकार हांणी सभेंत जाप दिली. ४५ हजार लोक म्हणल्यार ३ टक्के जातात. गोंयची लोकसंख्या १५ लाख आसा. उरिल्ले ९७ टक्के जनतेक तोंड दिवपाची तयारी मंत्री राणे हांणी दवरची, अशें पाटकार हांणी म्हणलें.
जेल भरो आंदोलन : युरी आलेमांव
कलम ३९ अ रद्द करपा वांगडा आमदार विरेश बोरकाराक भायर काडपी पुलिसांक निलंबीत करिना जाल्यार जेल भरो आंदोलन करपाची शिटकाणी काँग्रेस विधीमंडळ फुडारी युरी आलेमाव हांणी दिली.
२०२७त विरोधकांचे युतीची गरज : वेंझी व्हिएगस
गोंय वाटावपा खातीर २०२७चे वेंचणुकेंत विरोधी पक्षांची युती जावप ही गरज. पक्षान युतीची तयारी दाखयली ना जाल्यार युती गरजेची आशिल्ल्याचें आमी पटोवन दितले, अशें वेंझी व्हिएगस हांणी म्हणलें.
कलम ३९ अ विशीं न्यायालयांत निर्णय जातलो : विजय सरदेसाय
कलम ३९अ चो मुद्दो न्यायालयांत आशिल्ल्यान हाचेर न्यायालय निर्णय घेतलें. प्रादेशीक आराखड्याची रोखडीच कार्यवाही करपाची मागणी आमदार विजय सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
