भांगरभूंय | प्रतिनिधी
सरकार हें लोकांचें आसता, लोकांक लागून आसता आनी लोकां खातीर आसता. म्हणल्यार लोकांची सत्ता, लोकांनी वेंचून काडिल्ली आनी लोकांच्या हिता खातिरूच ती सत्ता आसपाक जाय. सगल्यांत पयलीं हें ‘आॅफ द पीपल, बाय द पीपल, फाॅर द पीपल’ वाक्य उच्चारलें मंत्री डेनियल वेबस्टर हांणी 1830 त, मागीर धर्मगुरू, फुडारी थिओडर पार्कर हांणी 1850 त. पूण तें चड गाजलें अमेरिकेचे अध्यक्ष अब्राहम लिंकन हांच्या 1863 तल्या भाशणाक लागून. सरकारा विशीं संवसारांत खंयूय कोण बरयता, उलयता तेन्ना ह्या वाक्याचो उल्लेख जाताच. पूण, 200 वर्सांच्या काळांत कितल्या सरकारांनी हे व्याख्येक पाळो दिला? मुख्यमंत्री डाॅ. प्रमोद सावंत हांणी सांजवेळा आमदार विरेश बोरकार हांणी आपल्यो मागण्यो विधानसभेंत मांडच्यो, अशें सांगलें. ताचेर चर्चा करपाचें आस्वासन दिलें. उपास सोडपाची विनवणीय केली. पूण, आमदार बोरकार आंदोलनाचेर ठाम आसात. टीसीपी कायद्यांतलें 39 अ कलम रद्द करचें. तशें विधेयक हाडून मंत्रीमंडळान आनी विधानसभेन ते मंजूर करचें. ह्या कलमा खाला मंजूर केल्लीं सगलीं बांदकामां, प्रस्ताव रद्द करपाचें प्रतिज्ञापत्र अॅडव्होकेट जनरलान न्यायालयांत सादर करचें. तो मेरेन उपोशण चालूच उरतलें, अशें ते म्हणटात.
पयर सांजवेळा आंदोलक अचकीत दोना पावला टीसीपी मंत्र्याच्या बंगल्या कडेन गेल्ल्यान वातावरणांत तणाव निर्माण जाल्लो. पूण, आंदोलकांनी स्वताक हिंसक जावंक दिवंक ना. आंदोलनाक वेंर वता काय अशें मात दिसलें. खाजगी बंगल्याचेर मोर्चो व्हरपा वयल्यान आरजीचे मनोज परब आनी आमदार विजय सरदेसाय हांचे मदीं वाद जालो. भुरग्यांक, बायलांक 7 किलोमिटर चलत व्हरपाक तीं गोरवां न्हय, जमनीचीं रुपांतरां सगल्यांत पयलीं सरदेसाय हांणी 16 ब वरवीं केल्यांत…. अशीं वक्तव्यां जालीं. आमदार बोरकार सैम, लोकां खातीर उपास करतात ही गजाल खरी, पूण ते खातीर भलायकी पणाक लावप धोक्याचें थारूं येता. प्रादेशीक आराखड्या वेळार हाचे परस व्हडलें आंदोलन जाल्लें. सरकारूय पडिल्लें. उपरांत कितें जालें? आराखडो येवंक ना, पूण तेन्नाचे परस चड रुपांतरां जाल्यांत. सगलेच हें उलयतात. तातूंत आतां 39 अ आनी 17 (2) हीं कलमां. कसलेय जमनीचें रुपांतर करपाक मेळटा. विधानसभेंत हाचेर भासाभास करपाचें आस्वासन दिलां खरें, पूण तीं कलमां रद्द जातलीं, जमनी आशिल्ल्या तश्यो जातल्यो, अशे साबार प्रस्न गोंयकारांक पडल्यात.
गोंयांत मळां, सडे, शेतां, दोंगरांचें रुपांतर जाल्ल्याचें दोळ्यांनी दिसता. पेडण्यां दोन लाख चौ. मिटरां वयर जमीन रुपांतर जालां अशें थंयचो आमदार सांगता. दरेका तालुक्यांत फाटल्या 25 वर्सांच्या काळांत कितलीं जमीन रुपांतरीत जाल्या- थंय निवासी प्रकल्प कितले आयल्यात. तातूंत गोंयकार रावतात, काय परप्रांतीय- कोमुनिदादी आनी सरकाराच्यो 25 वर्सां पयलीं कितल्यो जमनी आशिल्ल्यो, आयज कितल्यो आसात- बोगस जमीन विक्री प्रकरणांत करबट फारावलां. हें कर्म तांणीच केलां, काय विस्वण, चणाकांय भितर घुस्पल्यांत, तांचीं नांवां भायर कित्याक येवंक नात- कितल्या गोंयकारांनी आपल्यो जमनी विकल्यात- गांवचे गांव विकून दुडू मेळटलो,
पूण मागीर गोंय हें गोंय उरतलें…. ह्या प्रस्नांच्यो जापो सोदपाचो यत्न जातलो?
आंदोलनाचेर आंदोलनां जातात. समाजमन अस्वस्थ जालां. सरकारा विशीं असंतोश वाडपाक लागला, हें कोणें सांगपाची गरज ना. कलमां रद्द केल्यार जमनींचें रुपांतर करपाक, परवाने दिवपाक पयशे घेतल्यात, जमनी विकून अब्जांनी रुपया घेतल्यात ताचें कितें करतले, तोय प्रस्न आसाच. निदान फुडाराक सैमाचें वस्त्रहरण, विक्री जावची ना, अशे कडक कायदे करचे. सध्याचें वातावरण पळयल्यार कलमां रद्द करचीं पडटात, अशें जाणवता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
