भांगरभूंय | प्रतिनिधी
नक्शा उप्रकमाचें मुख्यमंत्र्यां हस्तुकीं उक्तावण
पणजी : राज्यांत कांय पंचायतीं कडल्यान कोयर संकलनाचें प्रमाण शून्य आसा. नक्शा उपक्रमा खाला जावपी जीआयएस सर्वेक्षणा उपरांत आस्थापनां कडल्यान अचूक कर वसूल करप शकय जातलें. ह्यान फुडें पंचायती वा नगरपालिकांक कर संकलनाच्या प्रमाणाचेर आधारीत अनुदान दितले, अशें मुख्यमंत्री डॉ. प्रमोद सावंत हांणी स्पश्ट केलें.
पुराय देशांत आयज नॅशनल जीओस्पॅशीयल नोलेज बेस्ड लँड सर्वे ऑफ अर्बन हॅबिटेशन्स (नक्शा) ह्या उपक्रमाचें उक्तावण केलें. गोंयांत डॉ. सावंत हांचे हस्तुकीं उपक्रमाचें उक्तावण जालें. ह्या उपक्रमा खाला देशभरांत १५२ नागरी संस्थांच्या जमीन सर्वेक्षण कागदपत्रांचें डिजीटायजेशन वा नुतनीकरण करतले. जीआयएस सर्व्हेच्या आधारार सर्वेक्षण तशेंच जमीन कागदपत्रांचें नुतनीकरण करतले. पणजी महापालिका, मडगांव आनी कुंकळ्ळी पालिकेंत जीआयएस सर्वेक्षणा सयत सर्वे तशेंच कागदपत्रांचें नुतनीकरण/आधुनिकीकरण करतले.
सामको उपेगी असो हो उपक्रम. पणजी, कुंकळ्ळी आनी मडगांव पालिका वाठारांत आतां सर्वेक्षणाक सुरवात जातली. लोकांनी विरोध करिनासतना सर्वेक्षणाक सहकार्य करपाची गरज आसा. जमनीच्या धनयाच्या नांवान (टायटल) बदल जावचो ना. मात जमिनीचें क्षेत्रफळ, लांबी, रूंदी आनी ताचेवेलीं बांदकामां स्पश्ट जातलीं. बांधकाम परवाने, उदका पुरवण, अतिक्रमण, आपत्ती वेवस्थापन, कर आकारणी तशेंच उदरगती खातीर नियोजन करप हें जीआयएस सर्वेक्षणा उपरांत सुरळीत जातलें. शाराचो वा नगरपालिका वाठाराचो नकासो तयार जातलो, अशें डॉ. सावंत हांणी म्हणलें.
बाजारांत अतिक्रमणाक लागून रस्ते अरूंद जाल्यात. हाका लागून उजो लागल्यार उजो पालोवपी दळाची गाडीय घडणुके सुवातेर पावप अशक्य आशिल्लें. जायते फावटीं निवासी संकुलांतूय वेपारी कार्यालयां स्थापन जातात. नक्शा उपक्रमा खाला जीआयएस सर्वेक्षणा उपरांत इमारती तशेंच बांधकामांची स्थिती कळपाक मजत जातली. नगरपालिकांक कर आकारप सुरळीत जातलें, अशें डॉ. सावंत हांणी म्हणलें.
भू सर्वेक्षण संचालक रोहित कदम आनी महसूल सचीव संदीप जॅकीस हांणी नक्शा उपक्रमाची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
