कर शुल्काक विरोधः टॅक्सी संघटणा

भांगरभूंय | प्रतिनिधी

पेडणें उपजिल्होधिऱ्याक भेटयलें निवेदन

भांगरभूंय । प्रतिनिधी

पेडणें: मोपा आंतरराष्ट्रीय विमानतळ वाठारांत टॅक्सी स्टॅण्ड अधिसुचीत करतना कसलेच तरेचें शुल्क लागू करचें न्हय. हे गजालीक आमचो खर विरोध आसतलो, अशें ग्रीन फिल्ड मोपा एरपोर्ट टॅक्सी असोसिएशना वतीन पेडणेंचे उपजिल्होधिकारी दीपक वायंगणकार हांकां निवेदन सादर केलां.

आमदार प्रवीण आर्लेकार हांणी सुदीप ताम्हणकार हांकां घेवन मुख्यमंत्री डॉ. प्रमोद सावंत हांचे कडेन कसली चर्चा केल्या ताची म्हायती आमकां दिवंक ना. ती म्हायती आमकां दिवची, तशेंच बेगिनात बेगीन टॅक्सी स्टॅण्ड दिवचो अशी मागणी ग्रीन फिल्ड मोपा एरपोर्ट टॅक्सी असोसिएशनाचे भास्कर नारुलकार हांणी केल्या.

मोपा विमानतळा खातीर ज्या थळाव्या लोकांच्यो जमनी गेल्यात त्या वेवसायिकां कडल्यान सरकारान वा मोपा विमनतळ तयार करपी जीएमआर कंपनीन कसलेच तरेचें शुल्क वा कर लागू करचो न्हय. एकाद्या वेळार कावंटर मेळना जाल्यार ताची अनामत रक्कम करपाक घेवपाक हरकत ना, पूण हेर कसलेच तरेचो कर आमी भरपाक शकचे नात, अशें नारुलकार हांणी सांगलें.

सरकारान फकत 200 टॅक्सी वेवसायिकांक परवानो दिवपाचें जाहीर केलां. पूण ह्या वाठारांत 1300 परस अदीक वेवसायिकांनी टॅक्सी विकत घेतल्यात. त्या सगळ्यांक परवाने दिवन बेगिनात बेगीन विमानतळार टॅक्सी स्टॅण्ड आनी कावंटर दिवचो. जर खाजगी कावंटरा वरवीं जे पद्दतीन तांकां सोयी सुविधा फी उपलब्ध जाता जाल्यार ब्ल्यू टॅक्सी स्टॅण्ड कित्तयाक जाय. ते परस यलो टॅक्सी स्टॅण्ड थळाव्यांक दिवन तांचे कडल्यान कसलेच तरेचें शुल्क घेवचें न्हय, अशी मागणी नारुलकार हांणी केल्या.

प्रसाद शहापूरकार हांणी सांगलें, पेडणें उपजिल्होधिकारी हांकां एक निवेदन सादर केलां. ज्या वेळार टॅक्सी स्टॅण्डा खातीर टॅक्सी वेवसायिकांनी आंदोलन केल्लें, त्या वेळार पेडणें उपजिल्होधिकारी दीपक वायंगणकार हांणी हस्तक्षेप करून आंदोलन फाटी घेवपाची विनवणी केल्ली. तांचे विनवणेक मान दिवन आमी आमचें आंदोवन फाटीं घेतिल्लें. त्या वेळार तांणी टॅक्सी स्टॅण्ड रोखड्या रोखडो अधिसुचीत करतले असो भरवसो दिल्लो. ते खातीर तांकां परतून निवेदन दिवन आयज मेरेन आमकां टॅक्सी स्टॅण्ड मेळूंक ना हाची जाणीव करून दिल्या. उदय महाले हांणी सांगलें, आमकां टॅक्सी स्टॅण्ड मेळना जाल्यार आमी परतून रस्त्याचेर देंवपाक तयार आसात.