भांगरभूंय | प्रतिनिधी
पणजी, बातमीदार : अर्थीक वर्स २०२३- २४ सोंपपाक कांय दीस उरल्यात. खुबशे लोक कर वाटावपा खातीर निमाण्या वेळार गुंतवणूक करपाचे पर्याय सोदतात. इक्विटी लिंक्ड सेव्हिंग्ज स्कीम (ईएलएसएस) आनी भौशीक फुडार निर्वाह निधी म्हळ्यार पीपीएफ हें कर बचतीच्या बर्या पर्यायां मदलें एक.
येणावळ कर कायद्याच्या कलम ८० सी खाला गुंतवणुकेचेर १.५ लाख रुपया मेरेन कपात जाता. कपात करपाक येवपी रक्कम तुमच्या एकूण उत्पन्नांतल्यान वजा करता. हाका लागून कराचेंय दायित्व उणें जाता. इक्विटी लिंक्ड सेव्हिंग स्किम्स म्हळ्यार इक्विटी म्युच्युअल फंड जे आपली मालमत्ता उण्यांत उणी ८० टक्के इक्विटी आनी इक्विटी संबंदीत साधनांत गुंतयतात, जाल्यार भौशीक फुडार निर्वाह निधी ही दिर्घकाळ सरकारी बचत येवजण आसा.
रिस्क आनी परताव्याचें गणीत
पीपीएफ हो सगळ्यांत सुरक्षीत कर बचत गुंतवणूक पर्यायां मदलो एक मानतात. हाचे उरफाटें, ईएलएसएस फंडांत रिस्क आसता कारण तुमच्या पयशांची गुंतवणूक शेअर बाजारांत करतात. शेअर बाजार चडपाची-देंवपाची शक्यताय आसता. पीपीएफांतलो व्याज दर पुराय कार्यकाळा खातीर निश्चीत करूंक ना. मात ताची हमी दितात. सध्या ७.१ टक्के व्याज मेळटा.
दुसरे वटेन ईएलएसएस निधीचें परतावो ताच्या पोर्टफोलियोंत आस्पाव केल्ल्या मालमत्ता वर्गांच्या कामगिरीचेर आदारून आसता. इक्विटी ओरिएंटेड येवजण आशिल्ल्यान, ईएलएसएस त पीपीएफ, एफडी सारकिल्ल्या निश्चीत उत्पन्न येवजण्यां परस दिर्घ काळांत चड परतावो दिवपाची तांक आसा. एमएफआय ह्या म्युच्युअल फंड कंपन्यांच्या संघटणे प्रमाण, वेंचीक अश्या एमएफआय फंडांनी फाटल्या ५ वर्सांनी बेंचमार्क निर्देशांका परस चड परतावो दिला. हातूंत क्वांट ईएलएसएस टॅक्स सेव्हर फंड, एसबीआय लॉन्ग टर्म इक्विटी फंड आनी डीएसपी ईएलएसएस टॅक्स सेव्हर फंड हांचो आसपाव आसा. हांणी फाटल्या तीन वर्सांनी २० ते ३० टक्के रिटर्न्स दिल्यात.
ईएलएसएस आनी पीपीएफ चे गुंतवणुकीचेर कलम ८० सी खाला कपात उपलब्ध आसा. एका अर्थीक वर्सा कलम ८० सी खाला चडांत चड कपात मर्यादा १.५ लाख रुपया आसा. रिटर्नसच्या करा बाबतींत, पीपीएफ म्हळ्यार भौशीक फुडार निर्वाह निधीक ईएलएसएसक फाटीं उडयता. हातूंत गुंतवणूक, व्याज आनी मॅच्युरिटीचेर परतावो, हे तिनूय करमुक्त आसात. ईएलएसएस विशीं, दीर्घकाळ भांडवल फायदो म्हळ्यार एलटीसीजी कर गुंतवणुकेंतल्यान मेळपी नफ्याचेर भरचो पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
