भांगरभूंय | प्रतिनिधी
देवान दरेका मनशाक जल्माक घालतना संवसारात तो कसलें सुख- दुख भोगतलो तें कपलार बरयिल्लें आसता, अशी लाखांनी लोकांची श्रद्धा आसा. आयच्या विज्ञान युगांत लेगीत लोक हें मानतात. हाचे कारण मनीस येवजीता ताच्या भायर कांय गजाली घडटात. देखीक व्हंकल न्हवऱ्याचे सव्याचेर हार, मंगळसूत्र बांधून, फकत पवित्र होमखणा भोंवतणी सात फेरे मारचें उरिल्ले आसतना व्हंकल वा न्हवऱ्याक अचकित काळजा आताक येवन मरण येता. मागीर लोक म्हणटात, ताच्या कपलार देवान (नशीबांत ) जितलें जगपाचें आशिल्लें तितलो तो जगलो.
जो मरता ताच्या फाटल्यान भलायके विशींची कांय कारणा लेगीत आसता, ही गजाल वेगळी. पूण तो वा ती मरता म्हूण मनीस देवाचेर धुकळून मेकळो.
ल्हानपण तें म्हातारपणा मजगतीं जिणेच्या दरेका मोडणार कितल्याश्याच संकश्टांक आमकां तोंड दिवचें पडटा. केन्ना आमी तातूंतल्यान बरें भशेन भायर सरतात, केन्ना त्या भोवऱ्यांत बुचकळटात. जो संकश्टांचेर जैत मेळोवन फुडें सुखी जाता ताका खरेंच तागेल्या नशिबांत बरे दीस बरयिल्ले म्हणून तो साल्वार आनी जो आडमेळ्यांत आडकता ताका बावड्याच्या नशिबांत देवान कितें बरयलां कोण जाणा म्हणून आमी मेकळे जातात. पूण दर खेपे देवाक खेपप. पूण सत्य परिस्थिती कितें ती कोणूच जाणून घेनात.
आदले तेंपाची पिळगी कमीत कमी सत्तर वर्सा वयर तरी जगतालीच. आजूनय शंभर वर्सांची पिराय हुपिल्ले लोक आसात. उरफाटे आर्विल्ल्या काळांतले लोक साठ वर्सां लेगीत जगपाक पावनात. काळजाचो आताक तरण्याट्यांक येवप हें सदचेंच, तातूंत काय अजाप ना, म्हणपा इतले जालां. पुर्विल्ल्या काळांत अशें घडटालें व्हय?
आदींच्या लोकांलो जेवणा- खाणाचेर ताबो आसतालो. चडशे सकाळीं नाश्तो घेतलो काय सकाळीं इकरांक सुमार पेज, देडाक जेवण, सांजची च्या आनी रातीं साडेसात- आठ जावचे पयलीं जेवताले. आतां दनपरां तीन वरांचेर, रातचे इकरां वरांचेर जेवतात. भायलें भेसळ, मसाल्याचें मनात येता तेन्ना खातात. सोरो हो पियेपाक केला. रातच्या जेवणा आदीं पिल्यार वखद. चड पियेल्यार वीख अशें म्हणटात. सोरो जिवाक बरो जरी म्हणटा तरी एक खेप व्यसन लागल्यार तें मागीर सुटपाक म्हाकठीण. हांव ताचेर सहमत ना. यत्न केल्यार व्यसन सुट्टा. मात आयचे तरणाटे आनी हेर खोशी जाली जाल्यार आनी दुख्ख जाल्यारुय पितात. दर आयतारा ओली पार्टी करपी लोक आसात. आतांचे पिळगेंत सोरो, गांजा, ड्रग्स, सिगार म्हणल्यार फॅशन जाल्या. भायल्यो भानगडीय वाडल्यात. ताका लागून तरणे पिरायेर हालींचे लोक संवसाराक अंतरतात. तेन्ना खंयच्या देवान तांगेल्या कपलार वेसनाक लागून मरतलो अशें बरयिल्लें काय, हो प्रस्न उप्रासता. आनीक देवाक कोणूय वायट मार्गार गेल्लो आवडटा काय? दुसऱ्याचें वायट चिंतपी, ताचें पाड घालपाक सोदपी, दुस्वास करपी देव नासता. हो सभाव मनशाचो. मनीस आयज बेगीन मरता, तो सगलो दरेकल्याचे कर्माचो भोग. तो हांगांच भोगचो पडटा.
भौतिक शास्त्रांतल्या एका नेमा प्रमाण दरेके क्रियेक समान आनी उरफाटी प्रतिक्रिया आसता. every action has an equal and opposite reaction. देवान संत- महंताक साक्षात्कार दिल्लो कांय धर्मीक ग्रंथांनी वाचूंक मेळटा. देव आसा काय ना हाचेर विस्वास दवरप दरेकल्याच्या भावर्थाचेर निंबून आसा, अशें म्हाका दिसता.
तशें पळोवंक गेल्यार संवसारिक कोरोना म्हामारीच्या काळांत कितलेशेच लोक मरणाचे भकिक पडलें. कोणाक खबर तरी आशिल्लें व्हय संवसाराचो प्रवास असो अर्ध्यार सोडचो पडटलो म्हूण? सहज चिंतया जर कोरोना विशाणून परतून खरपणान मान वयर काडून दुयेंत पातळायल्ले जाल्यार कितें जावपाचें? कोरोना विशाणू मनशालें नशीब वाचून जीव घेता? ना न्हय! सृश्टी रचणाऱ्या त्या निराकारान विरुद्ध लिंगिक जल्माक घालून जिवसृश्टेक फुडें व्हरपाची निर्मणी केल्या तशेंच संवसारांत आयिल्लो हो परत वचपा खातीर येता, हें नक्की. पूण फाल्यां कितें घडत हें मात कोण सांगूक शकता?
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
