भांगरभूंय | प्रतिनिधी
आयज काल, हांव म्हजी नोकरी, धंदो, म्हजो संवसार हातूंतच घुस्पल्ले मनीस आमी पळयतात. वेगळी वाट चलपी खूब थोडे आसतात. तांतलोच एक म्हणल्यार सावयवेरेंचो दोतोर दत्ताराम देसाय. तो मूळचो सत्तरींतल्या पैकूळ गांवचो. गांवात साधन सुविधा सामक्यो कमी. अशे परिस्थितींत मुळावें शिक्षण पुराय करून माध्यमीक शिक्षणा खातीर तो सावयवेऱ्यां आपल्या मामागेर म्हणल्यार भट खेडेकारांगेर आयलो. तेन्नाचें उत्कर्श आयचें केआरएसएस हायस्कुलांत ताचें शिक्षण जालें. फुडे दोतोरकी करून तो सावयवेऱ्यां प्रॅक्टीस करपाक लागलो. लोकांची बेसबरी सोय जाली. नाजाल्यार साद्या साद्या थंडी जोरा खातीर तांकां माशेलांत नाजाल्यार फोंड्यां वच्चें पडटालें. धड बशी लेगीत नाशिल्ल्यो. पिकपींनी लेगीत लोक प्रवास करताले.
लोकांचे प्रस्न दोतोराक दिसपाक लागले. ताचे भितरलो समाजीक कार्यकर्तो अस्वस्थ जावपाक लागलो. आपणें फक्त दोतोरकी करून भागपाचे ना. हांच्या प्रस्नांत लक्ष घालचें पडटलेंच. हें ताका होलमलें. ह्याच वेळार ‘नायलॉन -66’ चें अरिश्ट गांवार, तेच बरोबर भोंवतणच्या वाठारांत येता हे ताच्या कानार गेलें. नायलॉन 66 आयल्यार गांवातले उदकाचे स्रोत, कुळागरां, शेतां हांचेर हावळ येतली हे सांगपाक कोणा भविश्यकाराची गरज नासली. एकदां उदक कुळागरां, शेतां-भाटां, संकश्टांत सांपडले उपरांत समाजाक किदें भोगचें पडटलें हें स्पश्ट नदरे मुखार येतालें. हळू हळू नायलॉन- 66 आड वातावरण तापपाक लागलें. आंदोलनाची कीट पडली. दोतोर देसाय आनी ताच्या सांगात्यानी आंदोलन मोठ्या नेटान फुडे व्हलें. सरकार आंदोलन चिड्डून उडोवपाक पळयतालें. त्यावेळचो थळावो आमदार लेगीत नायलॉन 66 च्या फावराद आसलो. तो एका नेमाळ्यांत सेगीत प्रकल्पाच्या फावोराद लेख बरयतालो.
लोक सहभागाक लागून आंदोलन जैतिवंत जालें. निलेश नायक हुतात्मा जालो. दोतोर देसाय आनी बाकीचे कार्यकर्ते दीसरात जीव तोडून वावुरले म्हूण हें शक्य जालें. नाजाल्यार आयज हांगासर जी शेतां-भाटां, कुळागरां , सैम दिश्टी पडटा ती निमाणे दीस मेजीत आशिल्ली आमकां दिसतलीं आसलीं.
फक्त आंदोलन केलें म्हूण जायना. लोकांक पर्याय दिवपाक जाय. दिका दाखोवपाक जाय. तांचे दीसपट्टे जिणेंत ज्यो किदें गरजो आसात त्यो भागोवपा खातीर हाताक काम जाय. शेतां पिकपाक जाय. भाटां तरतरपाक जाय. हे खातीर पयशांची गरज आसता. तो वेळच्या वेळार मेळपाक जाय. गांवांत राष्ट्रीयकृत बॅंक आसली. रिणां मेळप शक्य आसलें. मेजकेच लोक रिणां घेताले. अशा वेळार दोतोर आनी भाऊ माडगांवकार हांच्या मार्गदर्शना खाला चड करून बायलांचे पन्नाशेक आपवावुरपी गट तयार जाले. बायलां आपले परीन बचत करपाक लागलीं आनी तेच बरोबर बॅंके कडल्यान रिणां घेवपाक लागलीं. आपलीं शेतां, घरगुती शिक्षणीक गरजो भागयल्यो. कोणे फी भरली, कोणे मोटरसायकल घेतली, घराक सुलचे नळे घाले, धडो, बांद, दुरीग बांदले, बांयो मारून पंप बयसले. गोठ्यांत गोरवां होमेवपाक लागलीं, सोसायटीक दूद घालपाक लागले. गोबरगॅस प्लांट उबे जाले. भूतखांबा वयले गवळी लेगीत ह्या उदरगतीच्या वावरांत सामील जाले. हें चित्र खरेंच खोसदिणें आसलें. बॅंकेन काम करतना हांवें ते लागसून पळयला.
गांवांत धान्य सोसायटी आसली. ती परंपारीक पद्दतीन काम करताली. दोतोरान तातूंत सुधारणा करपाचे चितलें. स्वंयसहाय्य विभाग सुरू केलो. गांवांत आनी सरभोंवतणी अनसां, पणस हांचे बरे पैकी उत्पन्न जातालें ताचेर प्रिक्रया करपा खातीर पावलां उबारलीं. पणसाच्या गऱ्याचे चिप्स लोकांक मेळपाक लागले. थंय तयार जाल्लो म्हाल सोसायटींत दवरपाक लागले. तेभायर पणसाच्या भिकणाचे लाडू, चक्री, शेव हें लेगीत तयार जावपाक लागले. गोडेंमुताचे दुयेंस आशिल्ल्या लोकां कडल्यान ह्या लाडवाक बरीच मागणी आसा.
दोतोरान वाचनालयांतय लक्ष घालें. वाचलनालया खातीर संडासाची गरज आसली. गांवांतल्या फर्नांडीस कुटुंबां कडल्यान लाखांनी रुपयांची मजत घेवन बरें पैकी शौचालयां उबीं केलीं. गरजे वेळार ताणेंच आपल्या चल्याक घेवन तो निवळूय केला. गांवांतल्या व्हाळांनी देंवून प्लास्टीक पुंजायलें. जल यात्रा सुरू केली. कितल्याशाच लोकांनी हे जलयात्रेंत वांटो घेतलो. उदक आडयात, उदक जिरयात होवूय मंत्र लोकां मेरेन पावयलो. अशे तरेन चोंवयवटांनी काम करपी हो कर्मयोगी. गांवांत ताचो सत्कार जाता ही खोशयेची गजाल. दोतोराक बरी भलायकी आनी आयुश्य मेळूं, हीच देवा अनंता कडेन म्हजी मागणी. तथास्तू.
उमाकांत शेटये
8390745837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
