भांगरभूंय | प्रतिनिधी
भांगरभूंय । प्रतिनिधी
पोरणे गोंयः कर्मचाऱ्यांचो उणाव आशिल्ल्यान दिवाडी- रायबंद उदका मार्गा वयली फेरी सेवा बंद दवोपाचे प्रकार चल्ल्यात. आयताराक पांच दिसाच्या गणपती विसर्जना वेळार ह्या प्रकाराक लागून दिवाडकारांची सामगी गैरसोय जाली. फेरी नाशिल्ल्यान दिवाडे वटेन वाहनांची व्हडली रांग लागिल्ली दिसताली.
आयतारा दनपार मेरेन एकूच फेरी चलताली. सांजे कर्मचारी नाशिल्ल्याचें कारण दिवन फेरी बंद केली अशी म्हायती आग्नेलो मिनेझीस हांणे दिली. रायबंदर फेरी नाशिल्ल्यान लोकांक पोरणे गोंय- दिवाडी फेरीतल्यान वच्चें पडलें. गणपतीच्या पांचव्या दिसा आयिल्ल्या दिवाडेच्या लोकांच्या सोयऱ्याचें ताका लागून सामके हाल जाले.
फेरीक लागून दिवाडकारांक दिसपट्टे त्रास सोसचे पडटात अशें चिलय्या सावंत हाणे सांगलें. कांय फावट फेरीबोटी बंद पडटात. जायत्या फावट झुवारी न्हंयेक सुकती लागिल्ल्यान फेरी बंद दवोरच्यो पडटात. कर्मचारी नाशिल्ल्यान फेरी बंद दवोरपाचो नवो प्रकार आतां सुरू जाला अशें ताणे सांगलें. दिवाडी- पोरणे गोंय मजगतीं पूल बांदून दिवाडकारांक फेरीच्या त्रासांतल्यान वाटावपाची गरज आतां आसा अशें तांणे सांगलें.
फेरी बंद आसता तेन्ना रायबंदर वचपाक एक वरा परस चड वेळ वाट पळयत रावचें पडटा अशें नारायण वेर्लेकारान सांगलें. पूल हो एकूच मार्ग हे समस्येचेर आसा अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
