भांगरभूंय | प्रतिनिधी
डॉ. अजय गावडे हांकां कारणां दाखयात नोटीस
तीन दिसां भितर स्पश्टीकरण दिवपाचे निर्देश
एसएजी कर्मचाऱ्यांनी घुमटां- ढोल वाजोवन दिल्लो येवकार
भांगरभूंय । प्रतिनिधी
पणजी : सोमारा खेळां खात्याचे संचालक डॉ. अजय गावडे हांणी गोंय खेळां प्राधिकरणाच्या (एसएजी) कार्यकारी संचालकपदाचो अतिरिक्त ताबो घेतलो. ह्या वेलार एसएजी कर्मचाऱ्यांनी एके तरेचो व्हड सुवाळोच आयोजीत केल्लो. कर्मचाऱ्यांनी डॉ. गावडे हांचेर फुलांचो शिंवर केलो. तांकां उंवाळ्ळे. तशेंच घुमटां, ढोल वाजोवन तांकां येवकार दिलो. मात एसएजी कर्मचाऱ्यांची अतिउमेद डॉ. गावडे हांकां म्हारग पडल्या. मुख्य सचीव व्ही. कांडावेळू हांणी डॉ. गावडे हांकां कारणां दाखयात नोटीस जारी करून तीन दिसांत स्पश्टीकरण दिवपाक सांगलां.
मुख्य सचिवान जारी केल्ले नोटिशेंत म्हणलां, गोंय नागरी सेवेंतले वरिश्ठ अधिकारी डॉ. अजय गावडे हांणी गोंय खेळां प्राधिकरणाच्या कार्यकारी संचालकपदाची जापसालदारकी स्विकारतना गरजे भायर प्रसिद्धी केल्या. तातूंत फुलांचो हार घालप, ढोल वाजोवप हांचो आस्पाव आसा. नागरी सेवा अधिकारी आशिल्ल्या सरकारी कर्मचाऱ्याक अशें वागप सोबना. हे खातीर अश्या अवेवसायीक वागण्या खातीर शिस्तभंगाची कारवाय कित्याक करची न्हय, हाचें कारण डॉ. गावडे हांणी दिवचें. तांकां तीन दिसां भितर आपलें स्पश्टीकरण सादर करपाचे निर्देश दिल्यात.
मेळिल्ले म्हायती प्रमाण डॉ. गावडे हांणी मुख्य सचिवाक आपलें स्पश्टीकरण दिलां. तातूंत तांणी अशे तरेच्या येवकार सुवाळ्या विशीं आपल्याक कसलीच कल्पना नाशिल्लीं, अशें स्पश्ट केलां. फुलांचो शिंवर वा ढोल- ताशे हाचे विशीं लेगीत कांयच खबर नाशिल्ल्याचें तांणी स्पश्ट केलां. ह्या येवकार सुवाळो कार्यावळींत आपलो कसलोच वांटो नाशिल्ल्याचें तांणी सांगलां. ताबो घेतलो हें कळ्ळे परांत कांय कर्मचाऱ्यांनी हो सुवाळो आयोजीत केला आसतलो. आपली नेमणूक जाली म्हूण कांय जाणांक थाकाय दिसल्या आसतली, हे खातीर लेगीत येवकार सुवाळ्याचें आयोजन केल्लें आसुंये.
डिसेंबर मेरेन गोंया खातीर स्वतंत्र खेळां धोरण
राष्ट्रीय खेळां धोरणाचे धरतेर येता त्या डिसेंबर मेरेन गोंया खातीर स्वतंत्र खेळां धोरण हाडटले. हे खातीर खेळां मळा वयल्या सगल्या भागधारकांक विस्वासांत घेतले, अशें खात्याचे संचालक डॉ. अजय गावडे हांणी सांगलें. सोमारा तांणी गोंय खेळां प्राधिकरणाच्या (एसएजी) कार्यकारी संचालकपदाचो अतिरिक्त ताबो घेतलो. ह्या वेळार तांणी प्रसार माध्यमां कडेन संवाद सादलो.
डॉ. गावडे हांणी सांगलें, केंद्र सरकारान ‘राष्ट्रीय खेल नीती 2025’ जारी केल्या. हाचो आदार घेवन राज्यांक आपापलें खेळां धोरण तयार करपाक सांगलां. ते प्रमाण गोंया खातीर नवें खेळां धोरण तयार करतले. तातूंत प्रशिक्षक, संघटना, खेळगडे, खेळां मोगी अश्या सगल्यांचीं मतां लक्षांत घेतले. सध्या गोंयांत 2009 चें खेळां धोरण आसा. ह्या 16 वर्सांत खेळां मळार खूबशे बदल जाल्यात. हे खातीर नवें धोरण हाडप गरजेचें आसा.
गोंयान खेळा मळार उदरगत करची हे खातीर खेळां खातें आनी एसएजी हांणी एकवटान काम करप गरजेचें आसा. वेगवेगळें काम करिनासतना दोनूय विभाग एकवटान ही जापसालदारकी घेतले. एसएजी कडेन बरे प्रशिक्षक आसात. तांकां योग्य मार्गदर्शन तशेंच उर्बा मेळप गरजेची आसा. खात्याचो ताबो घेतले उपरांत लक्षांत आयिल्ल्यो समस्या सोडयतले. आमी गोंयांत खेळां पर्यटनाक चालना दिवचे खातीर लेगीत यत्न करतले, अशें डॉ. गावडे हांणी सांगलें.
सगल्या म्हालांनी खेलो गोवा केंद्र
खेलो इंडिया केंद्राच्या धरतेर गोंयांतल्या सगल्या म्हालांनी बेगिनूच खेलो गोवा खेळां केंद्र सुरू करतले. मदल्या काळांत कांय कारणा खातीर बंद आशिल्ले खेळां पुरस्कार अंदूंच्यान परतून सुरू करतले, अशें डॉ. गावडे हांणी सांगलें.
खेळां साधन सुविधांचे देखभाली खातीर आराखडो
गोंयांतल्यो खेळा साधन सुविधा, खेळां संकूल हांची देखभाल करचे खातीर आराखडो तयार करतले. हे विशीं मुख्यमंत्री आनी खेळां मंत्र्यां कडेन चर्चा करतले. ते उपरांत ह्यो सुविधा पीपीपी तत्वाचेर वा खेळां संघटणांक दिवपा संबंदांत विचार करतले, अशें डॉ. गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
