भांगरभूंय | प्रतिनिधी
पणजी : कर्मचारी भरती आयोगा वरवीं निवड जाल्ल्या 2,500 उमेदवारां मदीं 2,000 उमेदवारांचें मुळावे शिक्षण हे मराठीतल्यान जालांं. मराठींतल्यान मुळावे शिक्षण जाले आसले तरी कर्मचारी भरती आयोगाच्या परिक्षेचो कोंकणी पेपर सोडयतना कसलीच आडखळ येना. म्हजें मुळावे शिक्षण मराठींतल्यान जालां. कोणाक जाय तांणी मुळावे शिक्षण मराठींतल्यान घेवचें, अशें आवाहन मुख्यमंत्री डॉ. प्रमोद सावंत हांणी केले.
मुख्यमंत्री डॉ. प्रमोद सावंत हांणी मंगळारा राती सभाघरांत अर्थसंकल्पाच्या चर्चेक जाप दिली. ह्या वेळार तांणी ही म्हायती दिली. कर्मचारी भरती आयोगा वरवीं निवड जाल्ल्या उमेदवारा मदीं सगळ्यांत चड 63 उमेदवार फोंडें मतदारसंघांतले आसा. म्हज्या सांखळे मतदारसंघांतले चड उमेदवार ना. परिक्षेतल्या गुणा प्रमाण निवड जाता. कर्मचारी भरती आयोगा वरवीं गुणेस्त उमेदवार सरकारी सेवेंत येवपाक लागल्या अशें मुख्यमंत्री डॉ. प्रमोद सावंत हांणी सांगलें.
गोंय मनीसबळ उदरगत म्हामंडळात 6 ते 7 हजार लोकांक नोकर्यो दिल्या. हांकां सरकारी नोकर्यां सयत खाजगी कंपन्यांनी लेगीत नोकर्यो दिवपाचे यत्न आसा. अंदूं सावन म्हाविद्यालयानी कॅम्पस मुलाखती घेवपाक सुरवात जातली. खांडोळा म्हाविद्यालया सावन कॅम्पस मुलाखती घेवपाक सुरवात जातली. पीएम उशा येवजणे खाला गोंय विद्यापीठाक 100 कोटी रूपया मेळ्ळ्या. ह्या 100 कोटींतले 35 कोटी रूपया खर्च जाल्या.
हाचे फुडें रस्त्यांचेर जावपी खर्चाचेर नियंत्रण दवरपा खातीर पयली जीआयएस मॅपींग जातलें. जीआयएस मॅपींग जाले उपरांत निधीक मान्यताय मेळटली. हाका लागून एकाच रस्त्याचेर दुरूस्ती खातीर चड खेपे खर्च जावचो ना.
दयानंद सामाजिक येवजणे वरवीं मेळपी लावात वाड जातली. सध्या 543 येवजणे खाला मेळपी पयशे थेट बँक खात्यात (डीबीटी) जमा जाता. म्हयन्याक 50 कोटी जाल्यार वर्साक 543 कोटी थेट लावार्थ्यांच्या बँक खात्यांत जमा जाता.
दिवाडी मार्गाचेर पयली रो रो फेरी सुरू जातली. तशेच बालरथ येवजणे खाला आशिल्यो पोरण्या बशींच्या जाग्यार नव्यो बशी घालतले. वालंकिणी हांगा यात्री निवास उबारपा खातीर सरकारान जाग्याची मागणी केल्या. इंडिया एनर्जी सप्तका खातीर गोंय हे आतां कायमस्वरूपी थळ जालां, अशें तांणी सांगलें.
सेगीत सातवे खेपे हांवे अंदूं अर्थसंकल्प सादर केला. मुळाव्यो सुविधा, भलायकी, सामाजीक सुरक्षा, शिक्षण हाचेर भर दिवपी हो जेंडर अर्थसंकल्प आसा. हो अर्थसंकल्प पारदर्शक आनी विकसीत गोंय 2037 चेर आदारीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
