भांगरभूंय | प्रतिनिधी
पणजी : रोजगार निर्माण, रोजगार क्षमता आनी समाजीक सुरक्षा वाडोवपा खातीर केंद्र सरकारान रोजगार सलग्न प्रोत्साहन (ELI) येवजण मंजूर केल्या. रोजगार निर्मितीक मजत करपा खातीर हे येवजणे खाला कर्मचार्यांक आनी धनयांक उर्बा दितात. हे येवजणे खाला पयले फावट काम करपी कर्मचार्यांक एका म्हयन्याचो पगार (१५,००० रुपयां मेरेन) मेळपाक शकता आनी धनयाक अतिरिक्त रोजगार निर्मिती खातीर दोन वर्सां मेरेन सुविधा दितले, तशेंच उत्पादन क्षेत्रा खातीर आनीक दोन वर्सां खातीर वाडीव लाव दितले.
ईपीएफओ कडेन पयले फावट नोंदणी करपी कर्मचार्यांक १५ हजार रुपयां मेरेन एक म्हयन्याचो ईपीएफ पगार दोन हप्त्यांनी दितले. १ लाख रुपयां मेरेन पगार आशिल्लें कर्मचारी पात्र आसतले. पयलो हप्तो ६ म्हयन्यांच्या सेवे उपरांत आनी दुसरो हप्ता १२ म्हयन्यांच्या सेवे उपरांत आनी कर्मचार्यान अर्थीक साक्षरताय कार्यावळ पुराय केले उपरांत दितले. बचतीची संवय लावपा खातीर प्रोत्साहन रक्कमेचो एक भाग थारावीक काळा खातीर बचत खात्यांत कायम ठेव म्हूण दवरतले आनी उपरांत कर्मचारी ही रक्कम काडपाक शकतलो.
खासा करून उत्पादन क्षेत्राचेर भर दिवन सगळ्या क्षेत्रांनी अतिरिक्त रोजगार निर्माण करपाचो उद्देश आसा. १ लाख रुपयां मेरेन पगार आशिल्ल्या कर्मचार्यां खातीर मालकांक प्रोत्साहन मेळटलें. उण्यात उणे स म्हयने सेगीत रोजगार आशिल्ल्या प्रत्येक अतिरिक्त कर्मचार्यां खातीर सरकार मालकांक दोन वर्सां खातीर दर म्हयन्याक ३००० रुपयां मेरेन मजत दितलें. उत्पादन क्षेत्रा खातीर तिसर्या आनी चोवथ्या वर्सा खातीर लेगीत दितले.
ईपीएफओ कडेन नोंदणीकृत आशिल्ल्या आस्थापनांनी उण्यात उणे स म्हयन्यां खातीर उण्यात उणे दोन अतिरिक्त कर्मचारी (५० परस कमी कर्मचारी आशिल्ल्या मालकां खातीर ) वा पांच अतिरिक्त कर्मचारी (५० वा त्या परस चड कर्मचारी आशिल्ल्या धनयां खातीर) कायम स्वरूपांत नियुक्त करचे पडटले.
देशांत २ वर्सांच्या काळांत ३.५ कोटी परस चड नोकर्यो निर्माण करप हो रोजगार सलग्न प्रोत्साहन येवजणेचें उद्दीश्ट आसा, जे खातीर ९९,४६६/- रूपया खर्च अपेक्षीत आसा आनी १.९२ कोटी पयले फावट लावार्थी अपेक्षीत आसात.
हे येवजणेचो लाव १ ऑगस्ट २०२५ ते ३१ जुलय २०२७ मजगतीं निर्माण जाल्ल्या नोकर्यां खातीर लागू आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
