कर्नाटक स्टोरी

भांगरभूंय | प्रतिनिधी

दणदणीत प्रचार, बळिश्ट संघटन आसतनाय भाजपाक कर्नाटकांत सत्ता तिगोवप शक्य जालें ना. 224 जाग्यांचे विधानसभेंत भोवमता खातीर 113 जागे जाय. काँग्रेसीक 135, भाजपाक 66 तर जनता दल सेक्युलराक 19 जागे मेळ्ळे. कर्नाटकांत काँग्रेस सत्तेर येतली, पूण आमदारांच्यो उडक्यो सुरू जायत जाल्यार…. कारण हाचे पयलीं कांय राज्यांनी हें जालां. मतदार आनी मतदारसंघाचे सर्वांगी उदरगती खातीर उमेदवारांक सत्ताधारी पक्षांत वच्चें पडटा खंय. मतदारूच तसो आग्रो धरतात. कर्नाटकांत भाजपान बऱ्याच खांप्या मंत्र्यांक हे फावट तिकेट दिवंक नाासली. मागीर तांणी जड अंतःकरणान तत्वां खुटयाळ्याक लायलीं आनी काँग्रेसींत प्रवेश केलो. ते जिखूनय आयले. मात भाजपाचे 13 मंत्री हारले. हाचे वयल्यान हे खेपे कर्नाटकांत भाजपा विरोधांत खर ल्हार आशिल्लें, हें मान्य करचेंच पडटलें. पूण, काँग्रेसीक स्पश्ट भोवमत मेळटलें, अशेंय कोणाक दिसूंक नाशिल्लें. भोवतेकांनी हुमकळटे (त्रिशंकू) विधानसभेचो अदमास
उक्तायिल्लो.
राज्य वेंचणुकांच्या प्रचाराक सहसा प्रधानमंत्री वा केंद्रांतले व्हडले मंत्री वचनात. मात, हालींच्या वर्सांनी सगले जाण 3- 4 फावटी येवन वतात. कर्नाटकांत प्रधानमंत्री नरेंद्र मोदी, काँग्रेसीचे राहुल गांधी, सोनिया गांधी सगलीं येवन गेलीं. कोट्यांनी रुपया प्रचाराचेर खर्च जालो. भाजपाक वाजेवन लोकांनी काँग्रेसीक मतां दिलीं, अशें बऱ्याच जाणांक दिसता. थळाव्या मुद्द्यांचेर केंद्रीत केल्लें लक्ष्य आनी मुफत येवजण्यांच्यो घोशणा काँग्रेसीक जैताचो हात दिवन गेल्यो, अशें उरिल्ल्यांक दिसता. पोरूं कर्नाटक सरकाराचेर भ्रश्टाचाराचो आरोप जाल्लो. 40 टक्के कमिशन सरकार, पे- सीएम अश्यो मोहिमो चलिल्ल्यो. तातूंत बेळगांवचे कंत्राटदार संतोष पाटील हांणी गंभीर आरोप करून आत्महत्या केली. ह्या प्रकरणान बरींच मतां काँग्रेसी वटेन वळ्ळीं आसतलीं. दुसरो मुद्दो म्हारगायेचो. तिवूय भाजपाक बादली. धर्मीक मुद्दे उपस्थीत करून भाजपान मतांचें ध्रुवीकरण करपाचो यत्न केलो. पूण तो येशस्वी जालो ना. हिजाब, टिपू सुलतान, वेंचणुकेच्या तोंडारुच आयिल्लो धर्मांतरा वयलो केरळ स्टोरी सिनेमा…. प्रधानमंत्री नरेंद्र मोदी हांणी तर मतदान करतना जय बजरंगबली अशी घोशणा दियात, अशें आवाहन केलें. काँग्रेसीच्या मल्लिकार्जुन खडगे हांणी तांकां विखारी सोरोप म्हणलो. मारुतीच्या नांवाचो, हिंदू- मुस्लीम मुद्द्याचो फायदो दक्षीण भारतांत जाताच अशें ना. हेर कडलें सांगपाक येना. दक्षिणे कडल्यान एकसुऱ्या राज्यांत भाजपाची सत्ता आशिल्ली ती ह्या निकालाक लागून गेल्या.
काँग्रेसीन कर्नाटकांत थळावे मुद्दे घेतले. नेमकी हीच पद्दत तांणी हिमाचल प्रदेशांत आपणायिल्ली. उरफाटी भाजपाचे राष्ट्रीय पांवड्या वयले फुडारी राष्ट्रीय मुद्दे घेवन प्रचारांत देंवले. दुसऱ्यो जाती…. कोण कितेंय म्हूण, पूण जातींक वेंचणुकां वेळार खूब म्हत्व येता…. आनी त्यो निकालाचेर प्रभावूय घालतात. एखादो आडवाद आसत. जातीचोय प्रभाव हे वेंचणुकेंत दिसलो. लिंगायत समाज सदांच भाजपाच्या फाटल्यान रावला. भाजपान 69 लिंगायत उमेदवार उबे केल्ले तातूंतले 15 जिखले, तर काँग्रेसीच्या 46 मदले 37 जिखले. कर्नाटकाचे मतदार 5 कोटी 30 लाख. तातूंतले 14 टक्के लिंगायत, 12 टक्के वाॅक्कलिंग. देखून ह्या दोनूय समाजाक जो लागीं तो जिखता. पूण, भाजपान येडियुरप्पा हांकां मुख्यमंत्री पदा वयल्यान निखळायले, तेन्नाच लिंगायत रागार, फुगार जाले. उपरांत तांकां लागीं हाडपाचे यत्न जाले, पूण ते फळादीक जाले नात, अशें निकाला वयल्यान म्हणू येता. अनुसुचीत जातीचे 46 टक्के मतदार काँग्रेसी वटेन आशिल्ले, ते हे खेपे 60 टक्क्यां मेरेन वाडले. 88 टक्के मुस्लिम काँग्रेसमय जाले. अर्थांत हो जनमत चाचणेचो अदमास. अहिंदा (अल्पसंख्यांक, हिंदू मागासवर्गीय आनी दलीत) ही आदले मुख्यमंत्री सिद्धरमय्या हांची संकल्पना, डी के शिवकुमार हांची तरणाट्यां मदली लोकप्रीयता, राहुल गांधीची भारत जोडो यात्रा आनी साधनसुविधा उदरगत, अर्थीक विकास आनी समाजीक एकवटाचेर प्रचारांत दिल्लो भर हांचेंय काँग्रेसीच्या जैतांत योगदान आसा.
म्हादयचें उदक कर्नाटकांतलें नवें सरकार वळोवचें ना (वळयतले अशें काँग्रेसीन सांगलां.), हाचेर गोंयान आतां भर दिवचो पडटलो. गोंय काँग्रेसीन तशे यत्न करचे. काँग्रेसीक सत्ता मेळ्ळी, आतां मुख्यमंत्री पदाचे शर्यतींत शिवकुमार आनी सिद्धरामय्या आसात. जी. परमेश्वर हे तिसऱ्या क्रमांकाचे फुडारी. तीन उपमुख्यमंत्रीय जातले. कर्नाटकाच्या जैतान विरोधकांच्या मनांत आशेची नवी आंकरी किल्लून आयल्या. पूण, एकजूट नाशिल्ल्यान सपन साकार करपाक विरोधकांचें बरोच घाम गळोवचो पडटलो.