भांगरभूंय | प्रतिनिधी
बंगळुरू: फाटल्या दिसांनीच गोंयचे म्हायती तंत्रज्ञान मंत्री रोहन खंवटे हांणी सांगिल्लें, राज्यांतल्या सोळा वर्सां पिराये सकयल्या भुरग्यांचें सोशल मिडिया वापरपाचेर पुरायेन बंदी घालपाचे शक्यतायेचेर सरकार गंभीरपणान विचार करता. भुरग्यांचें लक्ष शिक्षणावेल्यान वयचें न्हय आनी तांची मानसीक भलायकी बरी उरची हो हे फाटलो मुखेल हेतू आसा. सध्या कर्नाटक सरकारान हे विशीं फुडाकार घेतिल्ल्याचें दिसता. कर्नाटकचे मुख्यमंत्री सिध्दरामय्या हांणी १६ वर्सां पिराये सकयल्या भुरग्यां खातीर सोशल मिडिया वापराचेर बंदी आसतली, अशी घोशणा केल्या.
सोशल मिडियाचो वापर वाडिल्ल्यान आतां सगल्याच पिरायेच्या लोकांक हाचें वेसन लागलां. विशेश म्हळ्यार ल्हान भुरग्यांचेर हाचे वायट परिणाम दिसतात. उपरांत ल्हान भुरग्यांक सोशल मिडिया पसून पयस दवरपाची गरज खुबश्या जाणांनी दाखयिल्ली.
कनारटक सरकारा कडल्यान २०२६-२७ ह्या अर्थीक वर्सा खातीर ४.४८ लाख कोटींचो अर्थसंकल्प सादर केला. तंत्रज्ञानाचेर आदारीत शिक्षण उपक्रम आनी भुरग्यांक ऑनलायन धोक्या पसून सुरक्षीत करपाक नियामक उपायांचो आसपाव अर्थसंकल्पांत केला.
ह्या नेमाची जेन्ना अंमलबजावणी जातली तेन्ना अशे नेम करपी कर्नाटक हें पयलें राज्य आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
