भांगरभूंय | प्रतिनिधी
कर्नाटकाचे विधानसभा वेंचणुकेन देशाच्या राजकारणाक एक नवी देख आनी दिका दिल्या. देशभरांतल्या पक्षांक, राजकी
फुडाऱ्यांक आनी कार्यकर्त्यांक अंतर्मूख जावन विचार करपाक लावपी हो निकाल. कारण हो निकाल निखटोच एका थारावीक धर्माच्या वा जातीच्या लोकांनी वा शिक्षणीक, अर्थीक, समाजीक स्थराच्या मतदारांनी दिल्लो कौल न्हय. सर्वसमावेशक कौल!
सत्ताधिशांक जेन्ना सत्तेचो माज चडटा तेन्ना तेन्ना मतदार तांचे आड आपलें मताचें अस्त्र- शस्त्र वापरता. कर्नाटकांत जनतेक गृहीत धरप, प्रचंड भ्रश्टाचार, पक्षांतर्गत धुसफूस अश्या कारणांनी सत्ताधारी भारतीय जनता पार्टी आड जनमत तयार जाल्लें. सत्तेर येवपा खातीर साम -दाम- दंड वापरप हें आतां सगल्याच राजकी पक्षांचें साधन जालां. एका काळार ‘पार्टी विथ डिफरंस’ आशिल्ली भाजपा ह्या बाबतींत हेर पक्षां परस चार पावलां मुखार आसा हें फाटल्या चार- पांच वर्सांच्या राजकी घडणुकांतल्यान दिसून आयलां.
मतांचें ध्रुवीकरण करपाचे नदरेन जातीं- धर्मां मदीं दुस्वास निर्माण करप, विरोधकांचेर फटीचे आरोप करून तांकां बदनाम करप, पयश्यांनी सहजपणान मतां मेळोवं येतात अश्या भ्रमांत रावप ह्या चालंत सिद्धांतांक कर्नाटक विधानसभा वेंचणुकेन फट थारायला.
2024 वर्साची लोकसभा वेंचणूक नदरे मुखार दवरून देशांतले भोवतेक पक्ष आपापली राज्य पांवड्यावेली भुमिका थारायतात. कर्नाटकाचो निकाल पळयल्यार प्रधानमंत्री मोदींच्या नांवार वेंचणूक सहजपणान जिखपाक शकतात, ह्या भ्रमांतल्यान आतां भाजपाक भायर सरचें पडटलें. ही वेंचणूक खरेपणीं भाजपा आड कॉंग्रेस अशी आशिल्ली, पूण ती हिन्दू आड मुसलमान असो भासोवपाचो दुर्दैवी यत्न जालो. सुदैवान सुज्ञ मतदारांनी ह्या यत्नाक कोयराची पेटी दाखयली. धर्मीक दुस्वासा परसय प्रादेशीक अस्मिता तशेंच स्वताचे अर्थीक हितसंबंध चड म्हत्वाचे आसात हें राजकी पक्षांक ताणीं दाखोवन दिलें. मुसलमान ‘देशद्रोही’ हें दाखोवपा खातीर पयशिल्ल्यान लेगीत कर्नाटकाचे वेंचणुके कडेन संबंध ना, अश्या घडणुकांचे व्हिडियो, खबरो लोकां मदीं पातळावन संभ्रम निर्माण करपाचो यत्न जालो. दुर्दैवान, निकाला उपरांत पराभवाच्या जाळांतल्यान तो चड जावपाक लागला. राजकी पक्षाच्या कार्यकर्त्यांनी जैताचे सुवाळे मनयतनाच हार स्विकारपाची मनोवृत्ती तयार करपाक जाय. तसो आदर्श तांच्या फुडाऱ्यांनी घालून दिवपाक जाय. दिल्ली विधानसभेचे वेंचणुके उपरांत आप पार्टीक दणदणीत यश मेळटगीच मतदारांक फुकटखाऊ, लाचार अशीं बिरुदां लावपी कार्यकर्त्यांची नितिमत्ता कितल्या सकयल्या स्थराची तें आदीं दिसून आयिल्लें. कर्नाटकाच्या मतदारांनी कॉंग्रेस पक्षाक इतिहासीक असो कौल दिला. ताचो दरेकल्यान सन्मान करपाक जाय. वेंचणुकांनी हार- जीत ही आसताच. ती सद्भावनेन स्विकारपाची मानसिकताय जाय.
एखाद्रो धर्म म्हणल्यार आपली मक्तेदारी अशें खंयच्याच राजकी पक्षान समजूंक फावना. काँग्रेस पक्ष सत्तेर आयल्यार हिन्दू धर्माचेर हावळ येतली म्हूण आड्डी मारतल्यांनी लक्षांत दवरपाक जाय कीं जो मेरेन देशांत काँग्रेस पक्षाची सत्ता आशिल्ली तो मेरेन आयचे इतलो धर्मीक द्वेश केन्नाच नाशिल्लो. कांय धर्मीक फुडाऱ्यांनीय लक्षांत दवरपाक जाय कीं एखाद्रो पक्ष म्हणल्यार तांची मक्तेदारी न्हय. कर्नाटकांतल्या निकाला उपरांत मुस्लीम वक्फ बोर्डान मुस्लीम आमदारांक मंत्रीपदांची जाहीरपणान मागणी केल्या तीय असंविधानीक आसा. काँग्रेस पक्षान असल्या मागण्यांक रजांवां बगर सुवात दिवंक फावना. मंत्रीपदां पात्रतायेचेर मेळचीं, जातीय वा धर्मीक कार्डाचेर न्हय.
विरोधकांक इडी, सिबिआय, आयटी सारखीं सगलीं अस्त्रां वापरून आपले वटेन ओडपाचो आनी जे येनात तांकां राजकारणांतल्यान सोंपोवपाचो यत्न केंद्र सरकार करता. अशे फाटभुंयेर जे धिरान आनी खंबीरपणान उबे रावल्यात त्या सगल्या विरोधकां खातीर हें जैत मनोधैर्य उंचावपी आसा. धंद्यांत जशी मक्तेदारी गिरायकाक पिडपी आसता तशीच राजकी एकाधिकारशाय सामान्य जनतेक पिडपी आसता. लोकशाहींत विधायक विरोध गरजेचो आसता. विरोध हो आचार आनी विचारांक आसचो. पं. नेहरू सावन डॉ. लोहिया, अटल बिहारी वाजपेयींसारख्या साबार जेश्ठ आनी श्रेश्ठ राजकारण्यांनी तसो आदर्श घालून दिला.
राजकारणांत राजधर्माचें पालन करप हो आदर्श राजकी फुडाऱ्याचो गूण. गुजरातांत हिन्दू-मुसलमान दंगली उपरांत अटल बिहारी वाजपेयीजीन गुजरातचे तेन्नाचे मुख्यमंत्री आनी आयचे प्रधानमंत्री नरेन्द्र मोदी हांकां राजधर्म पाळपाचो उलो मारिल्लो. वाजपेयीजींक तो नैतीक अधिकार आशिल्लो. आयज दरेका पक्षाच्या फुडाऱ्यांनी राजधर्माचें पालन करप हें आपलें परम कर्तव्य मानपाक जाय.
कर्नाटकांतल्या जनतेचें आनी गोंयचें सदांच आदीं सावन सौजन्याचें नातें आसा. गोंयच्या कांय आमदार- मंत्र्यांनी कर्नाटकांतले वेंचणुकेंत प्रचारांत देवन सकयल्या थरार वचून विधानां केलीं. कारवारच्या काँग्रेस उमेदवाराक ताच्या सैल आडनांवा वेल्यान बैल म्हूण उच्चारपा मेरेन पांवडो सकयल देंवलो. गोंय आनी खेरीतपणान कोंकणी भाशे कडेन सदांच लागींचें नातें आशिल्ल्या जेश्ठ कॉंग्रेस फुडारी आर. व्ही. देशपांडे हांच्या कार्यकर्त्यांनी निकाला उपरांत गोंयकारांच्या संदर्भांत उक्तायिल्ली भावना सामान्य गोंयकारांच्या न्हय तर राजकारण्यांच्या रागांतल्यान तांकांच उद्देशून व्यक्त जाल्ली आसा. कर्नाटकांतल्या वेंचणुके खातीर गोंय सरकारान पगारी सुटयेची तजवीज केल्ली. हाचे आदीं परराज्यांतल्या वेंचणुकां वेळार अशी सुटी दिल्ल्याच्यो देखी नात. हाचे फुडें गोंय सरकार महाराष्ट्र, उत्तर प्रदेश, झारखंड, बिहार सारख्या राज्यांनी वेंचणुकांत ही प्रथा कायम दवरता काय पळोवचें पडटलें.
कर्नाटकांत आतां नवें सरकार घडटलें. एक व्हड राज्य हातांत आयिल्ल्यान 2024 वर्सा जावपी लोकसभा वेंचणुकेचे फाटभुंयेर काँग्रेस पक्षाचें बळगें खात्रेन वाडलां. एक धर्म निरपेक्ष, स्थीर, उदरगतीशील, सामान्य मनश्याक केंद्रबिंदू मानपी संवेदनशील शासन दिवन हेर राज्यांनी आव्हान आनी विश्वास तयार करपाचो हावेस काँग्रेस पक्षाक बाळगुचो पडटलो. सरकार घडोवप तुलनेन सोपें, पूण तें तिगोवप भोव कठीण काम. शासनाक प्रतिश्ठा आनी लोकप्रियता मेळावन दिवप हें व्हड आव्हान. कर्नाटकाच्या मतदारांनी वेंचणुकांच्या निमतान लोकशाही आनी वेंचणूक प्रणाली कडेन निगडीत दरेकाक सोद आनी बोध घेवपाक लायला इतलें मात्त खरें!
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
