भांगरभूंय | प्रतिनिधी
भारतीय संस्कृतायेंत बायलेक देवी मानल्या. देवा वांगडा देवींकूय आमी पुजतात. त्याच भक्तीभावान, उमेदीन, दबाज्यान पुजा, परबो मनयतात. पौराणीक साहित्यानूय देवींनी देवा परस व्हडले पराक्रम करून मनीसजातीची संकश्टांतल्यान सुटका केल्ल्याचीं उदाहरणां आसात. उपरांतच्या काळार गार्गी, मैत्रेयी सारक्यो दादल्याच्या खांद्याक खांद लावन वावुरपी विद्वान बायलो जावन गेल्यो. तांकां शिक्षण घेवपाक मनाय नाशिल्ली. कांय कडेन तर तांची मुंज पसून जाल्ल्याचे उल्लेख मेळटात. सांगपाचें म्हणल्यार, आदल्या तेंपार भारतीय संस्कृतायेंत बायलेक खंयच्याच मळाचेर उणाक लेखूंक ना. मागीर, बायलेक दुय्यम लेखप सुरू जालें. तिका चूल आनी मूल इतले पुरतीच मर्यादीत दवरली. रिती, परंपरांच्यो बेडयो पायांत आडकयल्यो. फक्त रांदप, वाडप, दादल्याक सुख दिवप, वंश वाडोवप…. बायलेक एक भोगवस्तूचें रुप पुरुशप्रधान संस्कृतायेन दिलें. अर्थांत सगलेच दादले एक सारके न्हय. बऱ्याच दादल्यांनी बायलांक मुखार काडलीं, शिकयलीं, स्वावलंबी केलीं. कांय बायलोय समाजा आड बंड करून मुखार सरल्यो. इतिहासांत अज्रंवर जाल्यो. ह्या एकविसाव्या शेंकड्यांत बायलो दादल्यां परस मुखार पावल्यात. पूण कांय कर्मदळिद्री दादले तांचे पांय ओडपाचें काम करतात. तांचें शोशण करतात. हालींच कर्नाटकांतल्या हासन शारांत एक व्हडलें लिंगीक शोशणाचें प्रकरण भायर सरलां.
आदले प्रधानमंत्री एच. डी. देवेगौडा हांचे नातू प्रज्ज्वल रेवण्णा हे ह्या कथित लिंगीक शोशणचे मुखेल सुत्रधार. तांचे आड एके वावराडेन पुलीस कागाळ करतकच हें प्रकरण परतून भायर फुटलें. कर्नाटकाच्या राजकारणांत खास करून जनता दल सेक्युलर आनी भाजपांत खवदळ जाला. कारण प्रज्ज्वल हो एनडीएचो उमेदवार. खुद्द प्रधानमंत्री नरेंद्र मोदी हांणी हालींच सभेंत ताचो प्रचार केल्लो. सध्या प्रज्ज्वलाक जेडीएसांतल्यान निलंबीत केला. हें प्रकरण उक्ताडार येतकच तो दुसरे दीस विदेशांत पळून गेलो. सध्या तो जर्मनींत आसा, अशें कळटा. ह्या प्रकरणांत ताका आनी ताचो बापूय आमदार एच डी रेवण्णा हांकां एसआयटीन चवकशे खातीर समन्स धाडल्यात. ह्या प्रकरणाची दखल कर्नाटक महिला आयोगानूय घेतल्या. ताची सारकी चवकशी जातली आनी दोशींक कडक ख्यास्त जातली, अशी आस्त.
नारीशक्ती, मातृशक्ती अशा उतरांनी राजकी पक्ष बायलांची तुस्त करतात. तांचे खातीर विवीध येवजण्यो जाहीर करतात. मात, कर्नाटकांत जें कितें जालें, तें वाचून कितें म्हणचें तेंच कळना. आतां दोश एकमेकांचेर धुकलपाचें काम चालू आसा. काँग्रेस भाजपाक दोश दिता, तर भाजपा म्हणटा, राज्यांतलें काँग्रेस सरकार कितें करता?
कोण ह्यो बायलो? हातूंत घरकाम करपी, सरकारी कर्मचारी, अधिकारी आसात. पक्षाच्यो वावुरपी, स्वताचें काम घेवन फुडाऱ्यां कडेन वचपी बायलो आसात. तातूंतल्या कांय जाणांक हे लिंगीक अत्याचार पसंत नात, हें व्हिडियोंत खंय स्पश्ट दिसता. म्हणजे तांचेर जबरदस्ती जाल्ली. थोड्यांक धमकावन संबंद दवरपाक तयार केल्लीं. प्रज्ज्वल हाचे कडेन पयलीं काम करपी ड्रायव्हरा कडेन असल्या 2976 व्हिडियोंचो पेनड्रायव्ह आशिल्लो. तो गौडा कुटुंबाचो सामको विस्वासू. भाजपाचे उमेदवार देवराज गौडा हांचे कडेनूय व्हिडियोंची काॅपी आशिल्ली. तांणी हे विशीं केंद्रीय गृहमंत्री अमित शाह, कर्नाटक भाजपा मुखेली विजयेंद्र हांकां कळयिल्लें. बायलांक ब्लॅकमेल करपाचो प्रकार चल्ला. काँग्रेसीच्या फुडाऱ्यां कडेन कांय व्हिडियो पावल्यात, अशेंय तांणी म्हणिल्लें. वेंचणुके वेळार आमचे आड हाचो वापर जावं येता, अशी भिरांतूय उक्तायिल्ली. अखेरीक हालींच ते व्हिडियो भायर आयले आनी बाॅम्बगुळो फुटलो.
सध्या लोकसभा वेंचणूक सुरू आशिल्ल्यान सगले पक्ष ह्या प्रकरणाचो फायदो घेवपाचो अर्थांतूच यत्न करतले. ताचो कर्नाटकांत जेडीएस, भाजपाक मार बसपाक शकता. पोरूं 1 जुनाक प्रज्ज्वल रेवण्णा हाणें बंगळूर सिव्हील कोर्टांत केस घाल्ली. 86 मिडीया आनी तीन व्यक्तीं आड तो आशिल्लो. आपले आड ही फेक न्यूज चलयल्या. तेन्ना व्हिडियोचें प्रक्षेपण बंद करपाक सांगचें. 2 जुनाक सकयल्या न्यायालयान ताच्या प्रक्षेपणाचेर बंदी घाल्ली. तीन व्यक्तीं मदीं तो ड्रायव्हरुय आशिल्लो. पूण वर्सभरा उपरांत हें प्रकरण परत चड नेटान मुखार आयलां. अर्थांत हाचे फाटल्यान राजकी पक्ष आसतलेच. देवेगौडा हें कर्नाटकांतलें सगल्यांत व्हडलें राजकी प्रस्थ. प्रधानमंत्री, खासदार, आमदार, मंत्री तांच्या कुटुंबांत जावन गेल्यात. सध्या आसात. म्हणटकच आमकां कोणूच हात लावपाक शकना, अशें प्रज्ज्वलाक दिशिल्लें आसतलें. लिंगीक शोशण करपा फाटल्यान हीच मस्ती आसतली. ती जिरोवचीच पडटली!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
