भांगरभूंय | प्रतिनिधी
कर्नाटकान जबरदस्त प्रदर्शन करतना 76वी राष्ट्रीय फुटबॉल वस्तादपण सर्त जिखली. सावदी अरेबियाची राजधानी रियाधाच्या किंग फहद आंतरराष्ट्रीय स्टेडियमाचेर कर्नाटकान संतोष ट्रॉफी खातीर जाल्ले फायनलींत मेघालय पंगडाक 3-2 अशा गोल फरकांनी हारयलो.
कर्नाटकान 54 वर्सांनी ही सर्त जिखली. ताणें निमाणे खेपे 1968-69त सर्त जिखिल्ली.
पांच दसकांचो दुकळ सोंपोवपी कर्नाटकान उत्कृश्ट सुरवात केली. सुनीलान रॉबिनाच्या लांब थ्रोच्या नेटार मॅचीच्या दुसऱ्याच मिनटाक गोल करून कर्नाटकाक आघाडी मेळोवन दिली. पूण, कर्नाटकाची ही खोशी चड वगत तिगूंक ना. मेघालयान आठव्या मिनटाक पॅनल्टी कॉर्नर मेळयलो. ब्रोलिंगटनान स्पॉट किकी वरवीं बरोबरीचो गोल केलो. मेघालयाक कांय मिनटांनी आघाडी घेवपाची संद लेगीत मेळ्ळी. पूण, फिगो सिंडाईक गोल करपाक जमलो ना.
कर्नाटकान मेघालयाचे हे चुकीचो फायदो घेतना बॉल आपल्या ताब्यांत घेतलो आनी 19व्या मिनटाक बेकलीन सुनीलाच्या पासाचेर गोल केलो. पयल्या अर्दांतलो खेळ सोंपपाक कांय मिनटां बाकी आसतना रॉबिनान गोल करून कर्नाटकाची आघाडी 3-1 अशी केली.
साबार आडखळ पयस करून फायनलींत सुवात मेळोवपी मेघालयान दुसऱ्या अर्दांत जबरदस्त खेळ केलो. पूण, ताका कर्नाटकाची बरोबरी करपाक जमंक ना.
सेमी फायनलींत मेघालयाक जैत मेळोवन दिवपी शीनान 60व्या मिनटाक गोल केलो. पूण, मेघालया वतीन तो निमाणो गोल थारलो. ते उपरांत कर्नाटकान प्रतिस्पर्धी पंगडाक आनीक गोल करपाची संद दिवंक ना. ते पयलीं तिसरे सुवाते खातीर जाल्ले मॅचींत सर्व्हिसेजान पंजाबाक 2-0 असो हारयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
