भांगरभूंय | प्रतिनिधी
बेळगांव: सुवर्ण विधान सौधा (एसव्हीएस) हांगा सोमार थावन जावपी कर्नाटक सरकारच्या गिमाळ्या अधिवेशनाचें फाटभुंयेर बेळगांव परतून एक फावट कर्नाटकाच्या पॉवर सेंटरांत रुपांतरीत जावपाक लागलां. सुरक्षा, रावपाची सुवात आनी आंदोलन नियंत्रणा खातीर येवजण्यो सुरू आसात.
राज्य विधीमंडळाचें गिमाळे अधिवेशन सोमारा 8 डिसेंबर सावन सुरू जाता आनी बऱ्याच काळा सावन प्रलंबीत आशिल्लो कळसा-भांडुरा उदक घुंवडावपाचो प्रस्न ह्या काळांत चर्चेचो मुखेल विशय जावपाची शक्यताय आसा अशें सूत्रांनी सांगलां.
8 डिसेंबर ते 18 डिसेंबर ह्या काळांत शारांतल्या हॉटेलांनी आनी रिसॉर्टांनी अधिकाऱ्यांनी सुमार 3500 कुडीं राखून दवरिल्ल्यान गोंयांतल्यान येवपी पर्यटकांक बेळगांवांत कुडी मेळची ना. जिल्होधिकारी मोहम्मद रोशन हांच्या मार्गदर्शना खाला जिल्लो प्रशासनान तयारी नेटान केल्या. जिल्लोधिकारी, पुलीस शेनवारा अधीक्षक आनी वेगवेगळ्या खात्यांतले वरिश्ठ अधिकारी अधिवेशन, रावपाची सुवात, येरादारी, सुरक्षा, जेवण आनी हेर गजालीं संबंदीत सगल्या वेवस्थेची तपासणी आनी नियाळ घेतलो .
अधिवेशन बरे भाशेन चलपा खातीर व्हड प्रमाणांत सुरक्षा व्यवस्था दवरल्या. पुराय मंत्रीमंडळ आनी सरकारी यंत्रणा बेळगांवां आसतली. देखून खर सुरक्षा आसा. उत्तर कर्नाटकांत पर्यटनाची मुळावी बांदावळ उदरगत करपाच्या हेतान ही सुविधा स्थापन केल्या, अशें जिल्लोधिकारी रोशन हांणी सांगलें.
उत्तर कर्नाटकांत, खास करून बेळगांवांत, जंय दीर्घकाळ सरकारचे दुर्लक्ष आसा, थंय बलिष्ठ प्रशासन आनी उदरगत करपा खातीर भव्य एसव्हीएस बांदला. उत्तर कर्नाटकांतल्या महत्वाच्या प्रस्नांचेर उण्यांत उणें दोन दीस ह्या अधिवेशनांत भर दितले अशें सूत्रांनी सांगलां.
कायदो आनी सुवेवस्था तिगोवन दवरपा खातीर 1 ते 21 डिसेंबर मेरेन एसव्हीएसच्या तीन किमी. पुणे-बेंगळुरू राश्ट्रीय म्हामार्गाचेर येरादारी खंडीत जावची न्हय हे खातीर भौशीक बसका, रॅली आनी ड्रोन वापरपाचेर निर्बंध घाल्यात.
मजगतीं, शारांतल्या रस्त्यांचे दुरुस्तीचें काम चालू आशिल्ल्यान, मार्ग बदलिल्ल्यान आनी व्हीआयपी येरादारीक लागून जावपी समस्यां विशीं नागरिकांनी हुस्को उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
