भांगरभूंय | प्रतिनिधी
बंगळुरू, खबरां संस्था ः महाराष्ट्राचे आदले राज्यपाल आनी कर्नाटकाचे आदले मुख्यमंत्री सोमनहळ्ळी मैल्लया कृष्णा (92) संवसाराक अंतरले. राजकी मळार तांणी केल्ल्या स दशकांच्या वावराक मान्यताय दिवन एस. एम. कृष्णा हांकां 2023 वर्सा भारताचो दुसरो सगळ्यांत व्हडलो नागरी सन्मान पद्मविभूषण पुरस्कार दिवन भोवमान केलो.
एस. एम. कृष्णा हांकां राजकारणांतले व्हड फुडारी मानताले. 2017 वर्सा ते भाजपांत आयले उपरांत राजकी नदरेन निश्क्रीय आशिल्ले. साठ वर्सांचे राजकी कारकिर्दींत तांणी आमदार, खासदार, मुख्यमंत्री, राज्यपाल ह्या पदां सयत जायतीं म्हत्वाचीं भौशीक पदां सांबाळ्ळीं.
कृष्णा हांचो राजकीय प्रवास 1960 च्या दशकांत सुरू जालो. सुरवेक तांणी अपक्ष म्हणून मद्दूर विधानसभेची सुवात जिखली. उपरांत प्रजा सोशालिस्ट पार्टीच्या तिकेटाचेरूय तांणी जैत मेळयलें. 1968 वर्सा कृष्णा हे मंड्या मतदारसंघांतल्यान खासदार जाले. 1968 ते 1970 आनी 1971 ते 1972 ह्या काळांत ते दोन फावटीं खासदार जाले. पूण तांकां राज्याच्या राजकारणांत सक्रीय रावपाचे आशिल्ले. देखून तांणी आमदारांची वेंचणूक लढयली. 1972 ते 1977 मेरेन ते आमदार जाले. 1972 वर्सा देवराज अर्स मंत्रीमंडळांत ते वाणिज्य उद्देग आनी संसदीय कामकाज मंत्री आशिल्ले. कर्नाटक प्रदेश काँग्रेस समितीचे (केपीसीसी) अध्यक्ष म्हणून 1999 वर्सा तांणी पक्षाक जैत मेळोवन दिलें. ते उपरांत तांणी मुख्यमंत्री पदूय स्विकारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
