कर्नाटकाच्या आदल्या महासंचालकाच्या खुना फाटल्यान घरच्यांचो हात?
भांगरभूंय | प्रतिनिधी
बंगळुरू, खबरां संस्था : कर्नाटकाचे आदले पुलीस महासंचालक ओम प्रकाश हांचो पूत कार्तिकेश हाणें आपले आवयक, पल्लवी मानसीक भलायकेची खर समस्या आसा, असो दावो केल्ल्याचें कांय सूत्रांनी ‘इंडिया टुडे टीव्ही’ कडेन उलयतना सांगलां. ओम प्रकाश हांच्या खून प्रकरणांत पल्लवी आनी तिची धूव कृती हांकां ताब्यांत घेतल्यात.
आपलो घोव आपणाक मारपाक शकता, दावो करून पल्लवीन खूब खेपे भंय उक्तायिल्ल्याचें कुटुंबांतल्या वांगड्यांनी सांगलें. तिच्या घोवान जायत्या वेळार तिका धमकावपा खातीर बंदूक भायर काडिल्ली असोय आरोप तिणें केल्लो. पल्लवी चड करून भ्रमात्मक अवस्थेंत (delusional state) आसताली. घडणुकांची कल्पना करताली आनी निराधार गजालींचो हु्स्को करीत बसताली, अशेंय सूत्रांनी उक्तें केलां.
कार्तिकेशाचे कागाळी प्रमाण, आतां ह्या प्रकरणांतलो मुखेल आरोपी आशिल्ली पल्लवी फाटलीं 12 वर्सां सिझोफ्रेनिया कडेन झुजताली आनी तिचेर उपचार सुरू आशिल्ले.
आयतारा पुलिसांनी पल्लवी आनी कृपा ह्या दोगांक चवकशी करपा खातीर ताब्यांत घेतलां. सूत्रांनी दिल्ले म्हायती प्रमाण, ओम प्रकाशाच्या पोटार आनी गळ्यार जायते फावटीं चाकू मारला. पुलीस घडणुकेच्या सुवातेर पावले तेन्ना ताची कूड रगताच्या कोंडांत पडिल्ली, अशें बेंगळुरू पुलीस मुखेली बी दयानंद हांणी सांगलें.
आयतारा सांजवेळा सुमार साडे चार वरांचेर ह्या खुनाची म्हायती मेळ्ळी अशें बेंगळुरू पुलीस मुखेल्यान फुडें सांगलें.
सुरवातीच्या तपासांतल्यान गजाली अंतर्गत स्वरुपाच्यो आसूं येतात अशें दिसता. तीक्ष्ण शस्त्र वापरलां अशेंय दिसता. जाका लागून चड रगत गेल्ल्यान ओम प्रकाश हांकां मरण आयलें अशें दयानंद हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
