भांगरभूंय | प्रतिनिधी
मांड्या, खबरां संस्था ः कर्नाटकांतल्या मांड्या लागसारच्या केरागोडू गांवांत आयतारा (28 जानेवारी) पुलिसांनी 108 फूट उंचायेचो हनुमान ध्वज काडलो. हाचे उपरांत हांगा वाद सुरू जाला. गांवकारांनी उबो केल्लो भगवो हनुमान ध्वज सकयल देंवोवपा खातीर पुलीस पावले तेन्ना लोकांनी तांकां आडायले. तांचे मदीं भाजपा आनी बजरंग दल कार्यकर्तेचोय आस्पाव आशिल्लो.
खरें म्हणल्यार फाटल्या सप्तकांत गांवकारांनी ग्रामपंचायती कडल्यान परवानगी घेवन हो हनुमान ध्वज हुबयल्लो. उपरांत ताचे आड कागाळी आयल्यो आनी प्रशासनान पुलिसांक ध्वज काडपाचो आदेश दिलो. प्रशासनाच्या ह्या आदेशाक लागून रागान गांवच्या लोकांनी शेनवारा (27 जानेवारी) दुकानां बंद दवरलीं.
आयतारा पुलीस ध्वज काडपाक थंय पावले तेन्ना हो विशय तापलो. तिडकिल्ल्या लोकांनी थळावो काँग्रेस आमदार रवि कुमार हांचे बॅनर फोडून ताचे आड घोशणा दिवपाक सुरवात केली. हाका लागून प्रशासनान गांवांत पुलीस दळ तैनात करून लोकांची गर्दी आडावपा खातीर लाठीचार्जाचो आदार घेतलो. उपरांत पुलिसांनी खांब्या वयल्यान ध्वज काडून थंय तिरंगो हुबयलो. त्याच वेळार गांवांत 144 कलम लागू केलो.
हे संबंदीं मुख्यमंत्री सिद्धरामय्या हांणी सांगलें, ‘जंय तिरंगो हुबयतात थंय भगवो ध्वज उबारप हे नेमा आड आसा. राश्ट्रध्वज उबारपाची परवानगी घेतिल्ली, पूण थंय दुसरोच ध्वज उबारलो.’
देवळा कडेन ध्वज हुबारपाक तेंको – मुख्यमंत्री
ह्या प्रकरणाचेर हुस्को उक्तायतना सीएम सिद्धरामय्या हांणी राष्ट्रध्वजाच्या जाग्यार भगवो ध्वज उबारला अशें सांगलें. हाचे फाटल्यान राजकारण आसूं येता. हें करपा फाटल्यान कोण आसा तें म्हाका खबर ना? हो देश लोकशाय आनी संविधाना प्रमाण वावुरता. तशेंच एका सुवातेर परवानगी दिल्यार हेर सुवातेरय तो नेम लागू जाता वा जातलो, अशेंय तांणी सांगलें.
आमच्या तरणाट्यांक दुखोवपाक आमी हांगा आयिल्ले नात. हांव अधिकारी, पुलीस आनी तरणाट्यां कडेन उलयलां. खाजगी सुवातेर वा देवळा लागसार हनुमान ध्वज हुबारपाक आमी तयार आसात. आमी तांकां पूर्ण तेंको दितले. आमींय रामभक्त, हें कोणे विसरचें न्हय, अशेंय मुख्यमंत्री सिद्धरामय्या हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
