भांगरभूंय | प्रतिनिधी
रस्त्यार थुकप्यांक एक हजार रुपया दंड
बंगळुरूः कर्नाटक सरकारान भौशीक भलायकेक लागून फुडाकार घेतला आनी तंबाखू विरोधी नवो कायदो चालीक लायला. ते प्रमाण आतां तंबाखूचीं उत्पादनां विकतीं घेवपा खातीर मनशाची पिराय १८ वर्सां वयल्यान २१ वर्सां मेरेन वाडयल्या. वांगडा कर्नाटक सरकारान हुक्का पार्लरांचेरूय बंदी घाल्या. भौशीक सुवातांचेर वा रस्त्यार गुटखा खावन थुकप्यांचेर एक हजार रुपया दंड घालतले. तांकां बंदखणूय जावं येता.
राष्ट्रपती द्रौपदी मुर्मू हांणी सिगारेट्स आनी हेर तंबाखूचीं उत्पादनां विधेयक, २०२४ क (जायरातींचेर बंदी आनी वेपार आनी वाणिज्य, उत्पादन, पुरवण आनी वितरण नियमन) मंजुरी दिली. उपरांत कर्नाटक सरकारान हो नवो तंबाखू विरोधी कायदो लागू केलो. हो कायदो राज्यांत प्रभावीपणान लागू करपा खातीर २००३ च्या केंद्रीय कायद्यांत गरजेच्यो सुदारणां केल्यांत.
ह्या सुदारीत कायद्या प्रमाण भौशीक सुवातांचेर सिगारेट ओडप आनी गुटखा खावन थुकपाचेर बंदी आसतली. तशेंच सुमार ३० कुडीं आशिल्लीं हॉटेलां, ३० परस चड लोक बसपाची तांक आशिल्लीं रेस्टॉरंटां आनी विमानतळांचेर धूम्रपान करपाक थारायिल्ले सुवातेर सुट दितले. पूण सामान्य भौशीक सुवातींनी खर निर्बंध घाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
