भांगरभूंय | प्रतिनिधी
कर्नाटकांतल्या ‘भद्रा’ शिंपणावळ प्रकल्पा खातीर केंद्रीय अर्थमंत्री निर्मला सीतारमण हांणी 5300 कोटी रुपयांची अनुदान दिवपाची घोशणा केल्ल्यान गोंयांत म्हादय प्रस्नाचेर नवो वाद निर्माण जाला.
गोंयांतल्या पर्यावरण वादी आनी भाजप विरोधकांनी आरोप केला की ही खाशेली घोशणा म्हणजे कर्नाटक शेजारच्या राज्यांतल्यान उदक चोरपाचें आपलें काम मुखार व्हरता हें सिद्ध जावप. तशेंच विधानसभा, लोकसभा वेंचणुके वेळार म्हादयच्या मुद्द्याचो वापर करून कर्नाटकांत चडांत चड सुवाती मेळोवपाचेर भाजपाची नदर आसा.
केंद्रीय गृहमंत्री अमित शहान 28 जानेवारीक बेळगांवी जाल्ले रॅली वेळार सांगलें की, 2007 त सोनिया गांधी हांणी गोंयांत केल्ल्या भाशणांत केंद्र सरकाराक म्हादय उदक कर्नाटकांत वळोवपाक आमी दिवचीं नात, अशें म्हणिल्लें. आतां हांव हांगां तुमकां सांगपाक आयलां, की केंद्रांतल्या भाजपान गोंय आनी कर्नाटका मदीं आशिल्लो हो म्हादयचो प्रस्न सोडयला. कर्नाटकांतल्या साबार जिल्ह्यांतल्या शेतकारांची तान भागोवपाक म्हादयचें उदक वळोवपाचो प्रस्न कर्नाटकाचे मुख्यमंत्री आनी गोंयच्या मुख्यमंत्र्यान केंद्राचे मजतीन एकमतान सोडयला.
केंद्रीय उदका आयोगान वादग्रस्त कळसा- भांडुरा धरणा खातीर कर्नाटकाच्या सविस्तर प्रकल्प अहवालाक (डीपीआर) परवानगी दिल्या उपरांत गोंयांतल्या विरोधकांनी भाजपा सरकाराचेर हल्लो चालू केला. 2023-24 वर्साच्या अर्थसंकल्पांत केंद्र सरकारान कर्नाटकाक शिंपणावळ कामा खातीर 5,300 कोटी रुपयांची मजत दिवपाची घोशणा केल्या.
ह्या टिप्पण्यांचो उल्लेख करून गोवा फॉरवर्ड पक्षाचे आमदार विजयी सरदेसाय हांणी म्हणिल्लें, “म्हादय प्रस्नाचेर अमित शाहान उक्तायिल्ले विचार हे राज्यांतल्या लोकांचेर फुटिल्ल्या बाॅम्बा सारके”
ताचेर टिका करतना सरदेसाय हांणी म्हणलां, “शेजारच्या राज्यांतल्यान कर्नाटक उदक चोरता”. “अर्थसंकल्प सादर करतना केंद्रीय अर्थमंत्री निर्मला सीतारमण हांणी बिरेस्तारा कर्नाटकांतल्या ‘ भद्रा’ शिंपणावळ प्रकल्पा खातीर 5,300 कोटी रुपयांचें अनुदान दिवपाची घोशणा केली. ” कृष्णा वाठार आनी म्हादय वाठारांतल्या उदक चोरून कर्नाटक तें ऊस उत्पादना खातीर वापरता. मतां मेळोवपा खातीर हें नाटक चल्लां, अशेंय सरदेसाय हांणी म्हणलां. कर्नाटकांत वेंचणुकेंत जागे मेळोवपा खातीर हें केलां, पूण ही वृत्ती गोंयांत भाजपाक मारक थारतली, अशेंय तांणी सांगलें.
अखिल भारतीय काँग्रेस समितीचे गोंय प्रभारी माणिकम टागोर हांणी गोंयांतले पयलेच पत्रकार परिशदेंत म्हादय प्रस्नाचेर भाजपा आनी आरएसएसाचेर खर टिका केली. गोंय आनी कर्नाटकाच्या भावनां कडेन भाजपा आनी आरएसएस (म्हादय प्रस्नाचेर) खेळटा. केंद्रीय गृहमंत्री अमित शाह हांचो निशेध करपाचें धाडस मुख्यमंत्री प्रमोद सावंत हांणी दाखोवचें, अशें तांणी म्हणलें.
गोंयच्या हक्कां विशीं भाजपा आनी आरएसएस संवेदनशील नात, तांचे खातीर वेंचणूक जिखप म्हत्वाचें. ते कर्नाटक आनी गोंय कडेन राजकारण करतात अशेंय टागोर हांणी स्पश्ट केलें. काँग्रेस गोंयच्या कल्याणा खातीर उबी आसा आनी लोकां वांगडाच आसतली. लोकांच्या हक्का खातीर आमी झगडटले अशें तांणी म्हणलें.
“काँग्रेसीन केन्नाच राज्यां मदीं फूट निर्माण करूंक ना. अशा प्रस्नांक आमी सदांच भावनीक पांवड्यार हाताळ्ळ्यात. पूण भाजपा हें फूट घालपाचें काम करता. थंय सुवाती वगडावंक लागिल्ल्यान ते भियेंल्यात, अशें काँग्रेसीच्या ठाकूर हांणी सांगलें.
आरएसएसाच्या गोंय विभागाचे आदले मुखेली प्रा. सुभाष वेलिंगकारानय ह्या विशयाचेर भाजपा सरकाराचेर टिका केल्या.
म्हादय वादाचेर शाहान केल्लीं टिप्पणीं हें एक “तथ्य” आनी राज्य सरकार “ह्या प्रस्नाचेर लोकांक फटयता” अशें तांणी सांगलें. “अमित शहा फट उलोवंक शकनात. जबाबदार मनीस बेजबाबदार विधानां करचो ना. ताका लागून अमित शहान जें कितें सांगलां तें गंभीर आनी खरें” अशें वेलिंगकार हांणी सांगलें.
गोंयचे पर्यावरण मंत्री निलेश काब्राल हांणी म्हादय प्रस्नाचेर केंद्रीय गृहमंत्र्याच्या निवेदनाचो निशेध केला, जाल्यार भाजपाचे जायते मंत्री आनी राष्ट्रीय फुडारी ताचेर टिप्पणी करपाक फाटीं फुडें जातात. “गृहमंत्री अमित शाहान केल्ल्या वक्तव्याचो हांव निशेध करतां. सगळ्यांत पयलीं आमी तांकां मेळ्ळे तेन्ना (11 जानेवारीक) हे खाशेले गजालीचेर (वाद सोडोवप) चर्चा जावंक नाशिल्ली. सीडब्ल्यूसीन दिल्ले परवानगी फाटीं घेवची अशी आमी विनवणी केल्ली.” डीपीआराक आमची संमती दिवपा विशीं आमी केन्नाच चर्चा करूंक ना अशें काब्रालान सांगलें. आमी चर्चा करूंक नासतना अमित शाह हांणी हें विधान कशें केलां तें म्हाका खबर ना. मुख्यमंत्र्यान लेगीत केन्नाच हाचेर चर्चा करूंक ना. म्हादय वाठारांतल्यान उदक भायर काडपाक आमी विरोध करतात अशें काब्रालान सांगलें.
पूण केंद्रीय पर्यावरण, रान आनी हवामान बदल मंत्री भूपेंद्र यादव हांणी शेनवारा गोंय भेटी वेळार सांगलें, म्हादय प्रस्नाचेर आपूण अभ्यास करतलों आनी तेन्नाच ताचेर टिप्पणी करतलों.
अजापाची गजाल म्हणल्यार गोंयचे आदले उदका संसाधन मंत्री आनी भाजपा फुडारी दयानंद मांद्रेकार हांणी म्हादय प्रस्नाचेर खर हरकत उक्तायल्या. शेजारच्या राज्याची तुळा तांणी ‘दुर्योधन’ कडेन केल्या, जांणी आपल्या भावांक कुसभर लेगीत जमीन दिवपाक न्हयकार दिल्लो. “हांव पांच वर्सां मंत्री आसतना आमी म्हादय न्हंयेची राखण करपा खातीर झगडले. ह्या प्रस्नाचो हुस्को आशिल्ले जायते लोक म्हाका मेळटाले. त्या वेळार अशी ‘दादागिरी’ नाशिल्ली,” अशेंय तांणी सांगलें.
गोंय आनी कर्नाटकांत सध्या केंद्रीय लवादा मुखार म्हादय न्हंयेच्या उदका वयल्यान ‘कळसा-भंडुरा’ बांद प्रकल्पा विशीं वाद सुरू आसा. म्हादयची उत्पत्ती कर्नाटकांतल्यान जाता आनी ती पणजें अरबी दर्याक मेळटा. कर्नाटकांत ही न्हंय 28.8 किमी., जाल्यार गोंयांत 81.2 किमी आसा. उत्तर कर्नाटकांतल्या धारवाड, हुबळील जिल्ह्यांक पिवपाक, शेती करपाक मलप्रभा न्हंय पात्रांत म्हादयचें उदक वळोवपाचो हेतू कर्नाटकान दवरला. देखून न्हंयेचेर धरण बांदपाची तांणी येवजण आंखल्या.
संजय बोरकार
प्रतिनिधी, आयएएनएस खबरां संस्था
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
