भांगरभूंय | प्रतिनिधी
बंगळूरू, खबरां संस्था ः गोंयांत कोंकणी भाशेक आपल्या अस्तित्वा खातीर सुरवातीक सावन झगडचें पडलां, हेर राज्यांनीय आतां आवयभाशेक वायट दीस येवपाक लागल्यात, अशें दिसता. निदान कर्नाटकांत तरी. कर्नाटकाचे मुख्यमंत्री सिद्धरामय्या हांणी कन्नडभाशकांक केल्लें आवाहन चर्चेचो विशय जावपाक लागला. कन्नड भाशकांनी आपले भाशेचो अभिमान बाळगूंक जाय. हे खातीर राज्यांतल्या सगल्यांनी फकत कन्नड भाशेंत उलोवचें आनी हेर भास वापरची न्हय अशें आवाहन तांणी केलां.
कर्नाटक विधीमंडळाच्या अस्तंत गेटा लागसार उबारिल्ल्या नाददेवी भुवनेश्वरी मातेच्या पुतळ्याचें उक्तावण करतना मुख्यमंत्री सिद्धरामय्या हांणी कन्नड भाशेचेर आपले विचार उक्तायले.
“कर्नाटकांत रावपी दरेकल्यान फकत कन्नड भाशेंत उलोवपाचो यत्न करचो. कन्नड भास सोडून हेर खंयचीच भास उलोवचे नात असो सोपूत सगल्यांनी घेवचो. कन्नड लोक उदार आशिल्ल्यानच आतां आमी हेर भासो उलोवन कर्नाटकांत रावपाक शकतात. तमिळनाडू, आंध्र प्रदेश वा केरळांत तशीच परिस्थिती तुमकां दिसची ना. थंय ते फकत आवयभाशेंतल्यान संवाद सादतात. देखून आमी आमचेच आवयभाशेंतय संवाद सादपाक जाय. ही आमचे खातीर अभिमानाची गजाल आसतली”, अशें सिद्दारमैयान खबरां संस्था एएनआय कडेन उलयतना उक्तायलें.
कर्नाटकांत कन्नड वातावरण तयार करप ही आमची सगळ्यांची जापसालदारकी. देखून हांगा रावपी सगळ्यांनी कन्नड भाशेंत उलोवचें. कन्नड भाशेची वळख वाडूंक जाय, आनी सगळ्यांक कन्नड भाशे वांगडाच आपल्या देशाचो, आपले जमनीचो अभिमान बाळगूंक जाय अशीय आस्त तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
