भांगरभूंय | प्रतिनिधी
मंगळुरू, खबरां संस्था: आयतारा कर्नाटक सरकारान पीरियड लीव्ह धोरण 2025 मान्य केलें. ह्या धोरणांत सरकारी कार्यालयांनी, खाजगी कंपनींनी आनी उद्देगीक क्षेत्रांत काम करपी बायलांक दर म्हयन्याक एक पगारी मासीक पाळयेची रजा वा वर्साक 12 सुटयो मेळटल्यो.
मुख्यमंत्री सिद्धरामय्या हांचे मंत्रिमंडळ बैठकेंत ह्या धोरणाचेर चर्चा जाली. काम एक वर्सा सावन चालूच आशिल्लें. कर्नाटकाचे कामगार मंत्री संतोष लाड हांणी म्हणलें, फाटल्या एका वर्सा सावन खातें हाचेर काम करता. हाचेर खुबश्या जाणांनी हरकत घेतल्या. आमी वेगवेगळ्या खात्यां कडेनूय उलयल्यात.
बायलांक खूब ताण येता, खासा करून दिसांक 10 ते 12 वरां काम करपी बायलांक. देखून आमकां मात्शें पुरोगामी जावन तांकां एक दीस सुटी दिवपाची इत्सा आशिल्ली. आतां तांकां म्हयन्यांत एक दीस सुटी घेवपाची सुविधा मेळटली. हाचो गैरवापर जावचो ना अशी आस्त बाळगीतां. गरज पडल्यार फुडाराक आमी आनीक नेम जोडटले.
60 लाख बायलांक फायदो जातलो
कामगार खात्याच्या म्हणण्या प्रमाण राज्यांत सुमार ६० लाख बायलो काम करतात. तातूंतलयो 25 ते 30 लाख बायलो कॉर्पोरेट क्षेत्रांत काम करतात. ह्या नव्या नेमांची म्हायती दिवचे खातीर विभाग सगल्या नियोक्त्यां कडेन बसका घेतलें.
धोरण मान्य जावचे पयलीं 18 वांगड्यांची समितीन कांय शिफारशी केल्यो, तातूंत मासिक पाळीच्या वेळार बायलांच्या कुडींत जावपी बदल, तांकां जावपी त्रास आनी ह्या काळांत विसव घेवपाची गरज हाचेर भर दिल्ली. हे समितीचें नेतृत्व क्रायस्ट विद्यापीठांतली कायदो विभागाची मुखेली सपना एस. हांणी केल्लें. उपरांत सरकारान ह्या प्रस्तावाचे फायदे आनी लुकसाण तपासलें, वेगवेगळ्या खात्यां कडल्यान आनी संघटणां कडल्यान सुचोवण्यो घेतल्यो आनी कपडो उद्देगा सारकिल्या बायलां प्रधान उद्देगांचेर जावपी परिणामांचोय विचार केलो.
बिहार, ओडिशांत पयलींच लागू
हाचे वांगडाच बायलांक मासिक पाळीची सुटी दिवपी थोड्याच राज्यां मदीं कर्नाटक एक राज्य जालां. बिहारांत बायलांक म्हयन्याक दोन फावटीं मासीक पाळीची सुटी मेळटा. ओडिसाक हालींच सरकारी खात्यांत काम करपी बायलांक एक मासिक पाळी सुटी जाहीर केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
