भांगरभूंय | प्रतिनिधी
बंगळुरू, खबरां संस्था: महाराष्ट्र सरकारान राज्यांत बायक टॅक्सीक मंजुरी दिल्या. राज्यांतली चडांत चड एक लाख लोकसंख्या आशिल्ल्या शारांनी आतां बायक टॅक्सी धांवतल्यो. जाल्यार कर्नाटकांत बायक टॅक्सीक बंदी घाल्या. कर्नाटक उच्च न्यायालयान बुधवारा एक निर्णय दिलो. ह्या निर्णया प्रमाण कर्नाटकांतली बायक टॅक्सी अॅप आनी सेवा बंद करतले. हाका लागून राज्यांतल्या रॅपिडो, ओला आनी सारकिल्ल्या बायक टॅक्सी सेवांक व्हड धक्को बसला. न्यायमुर्ती बी. एम. श्याम प्रसाद हांणी दिल्ल्या ह्या आदेशा प्रमाण, ह्या सगल्या बायक टॅक्सी सेवांक सहा सप्तकांत बंद करच्यो पडटल्यो. जो मेरेन कर्नाटक सरकार मोटर वाहन कायदो, १९८८ खाला खर नेम तयार करिना तो मेरेन ह्यो सेवा बंद उरतल्यो.
न्यायालयान खंयच्यो याचिका भायर मारल्यो?
कंपन्यांनी बायक टॅक्सींक कायदेशीर मान्यताय मेळची आनी दुचाकी वाहनांक परिवहन वाहनां म्हणून नोंदणी करपाची परवानगी मेळची, अश्यो मागण्यो करपी याचिका दाखल केल्ल्यो. मात न्यायालयान त्यो भायर मारल्यो. न्यायालयान सांगलें, येरादारी नाशिल्ल्या वाहनांची येरादारी वाहनां म्हणून नोंदणी करपाचे आदेश दिवपाक शकनात. तशेंच सरकाराक बायक टॅक्सीं खातीर नेम आनी मार्गदर्शक तत्वां तयार करपा खातीर तीन म्हयन्यांची मजत दिली.
कर्नाटकाचे परिवहन मंत्र्यान कितें म्हणलें?
‘इंडियन एक्स्प्रेसा’ कडेन उलयतना कर्नाटकचे परिवहन मंत्री रामलिंग रेड्डी हांणी, ह्या प्रकरणाचो आमी सविस्तर अभ्यास करतले. न्यायालयान स म्हयने आमकां दिल्यात. तशेंच योग्य तीं मार्गदर्शक तत्वांय तयार करपाक सांगलें. ते प्रमाण आमी काम करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
