भांगरभूंय | प्रतिनिधी
बंगळुरू : कर्नाटक विधानसभेंत विरोधकांची खर घोशणा आनी सेगीत बोवाळाच्या वातावरणांत ‘द्वेशपूर्ण भाशण आनी द्वेश गुन्यांव प्रतिबंधक विधेयक, २०२५’ मंजूर केलें.
गृह मंत्री जी. परमेश्वर हांणी विधेयक मांडटना समाजाक दुखोवपी विधानांत हालींच्या काळांत व्हडा प्रमाणांत वाड जाल्ल्याचें सांगलें. सध्या खुबशे जाण समाजांत वाकडेंपण निर्माण करपी वक्तव्यां करतात. हाचो नेमको परिणाम कितें जातलो, हें सांगू येना अशें तांणी म्हणलें. अश्या वक्तव्याक लागून खून, हल्ले आनी समाजीक ताण वाडत चलिल्ल्याचेंय तांणी नमूद केलें.
दुस्वासाक लागून धर्म, जात आनी लिंगभेदाचेर आदारीत भेदभाव जाता. ताका आळो घालपाची गरज आसा, अशें तांणी सांगलें. आपल्या वैयक्तीक अणभवांचो उल्लेख करतना तांणी सांगलें, बहिश्कार आनी भेदभाव हे फकत शब्द नासतात. हांव ल्हान आसतना शाळेंत वतना लोक म्हाका उदक लेगीत दिनासले, आंगार उदक उडयताले, अशें तांणी कृती सयत सांगलें. बसवण्णांच्या विचारांक शतकां जरी जालीं तरी समाजांत समानताय पुरायेन रुजूंक नाशिल्ल्याची खंतूय तांणी उक्तायली. डॉ. बाबासाहेब आंबेडकर सगल्यांक मान्य आसात. तांणी दिल्लें संविधान आमी प्रत्यक्षांत हाडपाक जाय, अशें तांणी म्हणलें.
विधेयकांतल्यो तरतुदी स्पश्ट करतना गृहमंत्र्यांनी सांगलें, भाशण, पुस्तकां वा इलेक्ट्रॉनीक माध्यमां वरवीं दुस्वास पातळावपी मनीस वा संघटणांक हे कायदे लागू जातले, अशें तांणी स्पश्ट केलें. ह्या कायद्या प्रमाण चडांत चड ख्यास्त, सात वर्सां मेरेन बंदखण, तशेंच ५० हजार ते १ लाख रुपयां मेरेन दंडाची तरतूद आसा.
विरोधी वांगड्यांचो विरोध
मजगतीं, भाजपा वांगडी, विरोधी पक्ष फुडारी आर. अशोक हांणी ह्या विधेयकाक खर विरोध केलो. हें विधेयक अभिव्यक्ती स्वातंत्र्याचेर आघात आशिल्ल्याचो आरोप तांणी केलो. स्वातंत्र्याक ७५ वर्सां पुराय जाले उपरांतूय अशे तरेच्या कायद्याची गरज कित्याक, असो प्रस्न हाजीर करून, ह्या कायद्याचो गैरवापर जावपाक शकता, अशें तांणी म्हणलें.
ह्या कायद्यांत जामिनाची तरतूद नाशिल्ल्याचो दावो करीत, पत्रकारांकूय ह्या कायद्या खाला बंदखण जावपाक शकता, अशी शिटकावणी अशोक हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
