भांगरभूंय | प्रतिनिधी
‘सेव्ह म्हादय सेव्ह गोवा’ची फाल्यां काणकोणां जाहीर सभा
भांगरभूंय । प्रतिनिधी
काणकोणः कर्नाटकांत विधानसभा वेंचणुको जावपाच्यो आसात. कर्नाटकांत भाजपाक चड सुवातो मेळच्यो आनी कर्नाटकाक खूश करचे खातीर केंद्र सरकारान गोंयची जिवनदायिनी आशिल्ली म्हादय कर्नाटकाक विकली. वेळारूच गोंयकार हे संबंदांत जागरूक जालो ना जाल्यार फाल्यां गोंयकाराक पिकासांव करचें बगर कांयच उरचें ना. गोवा रिव्होल्युशनरी पार्टीन काडिल्ली रॅली आडावप हें लोकशाये आड आसा. अशा सालाझारशायेक, हिटलरशायेक लोकूच सुवात दाखयतली, अशी शिटकावणी प्रशांत नायक हांणी दिली.
‘सेव्ह म्हादय सेव्ह गोवा’ची सोमारा काणकोणां जाहीर सभा जातली ते संबंदांत राजबाग वाठारांत घेतिल्ले पत्रकार परिशदेंत नायक उलयताले. ह्या वेळार विकास भगत, जनार्दन भंडारी, संदेश तेलेकार, जॅक फर्नांडीस, उमेश तुबकी आनी गास्पार कुतिन्हो हाजीर आशिल्ले.
सुर्ला न्हंयेचें उदक साळावली धरणाक मेळटा. फाल्यां ही न्हंय बंद जाले उपरांत साळावलीच्या लोकांकूय ताचो धग बसतलो. हो विशय उत्तर गोंयचो, आमकां दक्षीण गोंयच्या लोकांक कित्याक लागता, असो विचार करून चलचें ना. म्हादयचो विशय हो पुराय गोंयकारांचो आसा. पक्षीय राजकारण कुशीक दवरून ह्या आंदोलनांत, ह्या लड्यांत वांटो घेयात, असो उलो विकास भंडारी, जनार्दन भंडारी आनी संदेश तेलेकार हांणी मारलो. सोमारा सांजेच्या 4 वरांचेर चावडी काणकोणच्या पोरण्या बसस्टॅण्डाचेर जावपी हे जाहीर सभेंत पर्यावरण तज्ञ प्रा. राजेंद्र केरकार, फादर बॉलमॅक्स परेरा, आमदार विजय सरदेसाय मार्गदर्शन करतले, अशें भगत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
