भांगरभूंय | प्रतिनिधी
कर्नाटक, खबरां संस्था : कर्नाटकांतल्या कॉंग्रेस सरकारान इतिहासीक निर्णय घेवन ओबीसी वर्गांतल्या मुस्लिमांक आरक्षण दिलां. राज्य सरकाराच्या नोकर्यांनी आनी शिक्षणीक संस्थांनी आरक्षण दिवपाच्या हेतान मुस्लिमांचो ओबीसी वर्गांत आस्पाव केला. मुस्लीम आरक्षणाचो मुद्दो मुखेल विशय जाल्ल्यान हे फाटभूंयेर कर्नाटकांत कॉंग्रेस सरकारान घेतिल्लो हो निर्णय खूब म्हत्वाचो मानतात.
कर्नाटकांत ओबीसी खातीर ३२ टक्के आरक्षण मेळटा, आतां मुस्लिमांचोय हातूंत आस्पाव जाला. देखून कर्नाटकांतल्या सगळ्या मुस्लिमांक ४ टक्के आरक्षण मेळ्ळां अशें राष्ट्रीय मागास वर्ग आयोगाचे अध्यक्ष आनी संसद सदस्य हंसराज अहीर हांणी सांगलें.
कर्नाटकांत मुस्लिमांची लोकसंख्या १२.९२ टक्के आसा. कर्नाटकांतल्या सगळ्या मुस्लिमांक २- बी वर्गा खाला ओबीसी मानतात अशें राष्ट्रीय मागासवर्गीय आयोगान म्हणलां. ते प्रमाण श्रेणी एकांत १७ मुस्लीम समुदायांक ओबीसी मानलां, जाल्यार श्रेणी दोनांत १९ मुस्लीम समुदायांचो आसपाव केल्ल्याचें आयोगान स्पश्ट केलां.
ह्या मुस्लीम जातींचो आस्पाव
ज्या १७ मुस्लीम समुदायांक श्रेणी एकांत ओबीसींचो दर्जो दिला. तातूंत नदाफ, पिंजर, दरवेश, छप्परबंद, कसाब, फुलमाली (मुस्लीम), नालबंद, कसाई, अथारी, शिक्कालिगारा, सिक्कालिगर, सालाबंद, लदाफ, थिकानगर, बाजीगारा, जोहारी आनी पिंजारी हांचो आसपाव आसा. मजगतीं, २०११ चे जनगणने प्रमाण कर्नाटकांत मुस्लिमांची लोकसंख्या १२.३२ टक्के आसा.
कर्नाटकांत मुस्लीम आरक्षण दिल्ल्यान भाजपा आनी कांय संघटनांनी कर्नाटक सरकारचेर खर टिका सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
