भांगरभूंय | प्रतिनिधी
फोंडें: कर्नाटकांतल्यान बेकायदेशीरपणान आनी भलायके विशीं तपासणी करिनासतना गोंयांत हाडिल्लें सुमार कोंबडेचें १३१० किल मास जप्त केलां. अन्न आनी वखदां प्रशासनान (एफडीए) ह्या प्रकरणांत दोन गाडयोय जप्त केल्यात.
चड म्हायती प्रमाण, आयतार सकाळ सावन एफडीएच्या पंगडान कर्नाटकांतल्यान खावपाचे जिन्नस घेवन येवप्यांची तपासणी करपाक सुरवात केल्ली. मांस- नुस्त्याच्या वट्ट २५ गाडयांची तपासणी केली. तातूंत के ए ६३ ए २९ ४६ ह्या टेम्पोंत कोंबयेचें ७०० किल मांस सांपडलें. जाची किंमत एक लाख तीस हजार रुपया इतली आसा. हेर एक गाडी नंबर केए ६३ ३० ६९ हे गाडयेंत कोंबयेचें ६१० किल मांस सांपडलें. जाचें मोल ४३ हजार रुपया इतलें आसा. मांस, मटन, नुस्त्याची येरादारी करतना भलायके विशीं कांय नेम घाल्यात. हे ह्या दोनूय गाडयांनी पाळूंक नात. मनशाचे भलायके खातीर घातकी थारपी अशे तरेन ह्या कोंबयांची येरादारी जाताली. दोनूय गाडयो प्रशासनान जप्त केल्यात. मनशाचे भलायकेचे सुरक्षिततायेच्या कारणा वेल्यान धरिल्ल्या ह्या मासाचो विलो लायलो.
अन्न आनी वखदां प्रशासनाची संचालक श्वेता देसाय हांच्या मार्गदर्शना खाला संज्योत कुडाळकार, राजाराम पाटील, शैलेश शेणवी, अतुल देसाय आनी हेर अधिकार्यांनी ह्या प्रकरणांत प्रशासकी कामकाज पळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
