कर्नाटकांतलो नवो कायदो

भांगरभूंय | प्रतिनिधी

समाजाची ही मानसीकताय बदलपाची आसल्यार मोग, लग्नाचे चवकटी परस मनीसपणाची चवकट व्हडली करची पडटली.

पयलीं सावन समाजाक उपेगी पडपी, ताका उजू मार्गाचेर व्हरपी कायदे आसात. मात ते चालीक लागताच अशें ना. थोडे लोक कांय कायदे तर मनीस कोण तें पळोवन शस्त्रा सारके वापरतात. कालूच कर्नाटक विधानसभेन एक विधेयक मंजूर केलां. आंतरजातीय, धर्मीक लग्नांक लागून जोडप्याक धमक्यो मेळटात. छळ, मारपेट, खून (आॅनर किलींग) जाता. ताका जापसालदार आशिल्ल्यांक तीन वर्सां ते जल्मठेपे मेरेनची ख्यास्त दिवपाची तरतूद तातूंत आसा. सगल्यांचो तेंको मेळ्ळ्यार ताचें कायद्यांत रुपांतर जातलें. मात, तो खरपणान चालीक लागूंक जाय. अंधश्रद्धांचे बाबतींत कायदे आसात, देवाच्या नांवान शोशण करप्यां आडूय कायदे आसात. पूण, ते फायलींनी बंद आसात. गुन्यांव करप्यांक हाची कल्पना आसा. देखून ते गेड्यां कातीचे जाल्यात!
जात, धर्म मनशान घडयले. पूण मनशाक सैमान. देखून मनीस व्हडलो. मोगाक जात नासता. मात दुस्वासाक जात- धर्म लागता. भुरग्यांचे जिणेचेर पालकांचो तसो हक्क नासता. तांकां अधिकार फक्त मार्गदर्शनाचो. तरीय बरेच पालक भुरग्यांच्या दरेका निर्णयांत लुडबूड करतात. तांचें लग्न जालें तरी. कुटुंबाचे प्रतिश्ठे खातीर, समाज कितें म्हणटलो, म्हूण भियेवन वा लजेन मनीस तोंकाचीं पावलां उखलता. समाजाची ही मानसीकताय बदलपाची आसल्यार मोग, लग्नाचे चवकटी परस मनीसपणाची चवकट व्हडली करची पडटली… आनी तें करप आमच्याच हातांत आसा. कांय सुशिक्षीत कुटुंबां मना पसून वा नायलाजान काय जायना आंतरजातीय लग्नां मंजूर करतात. मात फुडाराक हे नाते संबंद सुदारताच अशें ना. कांय कुटुंबां त्या जोडप्या कडलो जल्मभराचो संबंद तोडून उडयतात. दोनूय कुटुंबां पयशेकार वा तीं जोडपीं स्वतंत्र रावपा इतली स्वावलंबी आसल्यार मात विरोध जायना. तसो मोग आसल्यार विजोड जोडपीं पसून सुखी संवसार करतात.
भारतांत जात, धर्म ही फक्त वळख न्हय, तर प्रतिश्ठा जाल्या. फायद्या खातीर सगले जातीचें घोडें नाचयतातूच, पूण आपलीच जात उंचेली, धर्म शुद्ध अशी मानसीकताय आसा. भुरग्यांच्या स्वातंत्र्याक कुटुंबाचे अब्रू कडेन जोडटात. हांगा लग्न हो वैयक्तीक निर्णय आसना, तर ती समाजीक कबलात समजतात. आमी देवी पुजतात, पूण घरांतल्या बायलांक परंपरेचे सांखळेन बांदून दवरतात. खाप- जात पंचायत, घर भायर दवरप हे हावके आयजूय आसात. त्या जोडप्याची फुडली पिळगी गोंदळटली, संस्कृताय नश्ट जातली, अशेंय लोकांक दिसता. हाचेर उपाय म्हणल्यार कायदे चालीक लावप. आॅनर किलींगाक उणीच जल्मठेप जायच!! कर्नाटकांत हालींच स म्हयन्याचे गुरवार बायलेक घरच्यांनी मारली. महाराष्ट्रांतूय हालींच तशीच गजाल घडल्या. थंय 20 वर्सांच्या चल्याक मारलो. मारप्याचे चलयेन चल्याचे तिरडे वयले कुडी कडेन लग्न केलें. राष्ट्रीय गुन्यांव नोंद विभागा वतीन 2019, 2020 त 25- 25, 2021 त 33 तर 2023 त 38 जाणांक कुटुंबाचे प्रतिश्ठे खातीर जिवेशीं मारल्यात. पुलिशेंत पावूंक नाशिल्लीं आनीक प्रकरणां आसतलींच. चडशीं प्रकरणां उत्तर प्रदेश, बिहार, राजस्थान, हरियाणांतलीं. खून करपी सगले घरचेच.
कर्नाटकांतूय आंतरजातीय लग्नां केल्यार सुविधा मेळटात. मात हो नवो कायदो जाल्यार धमकी, छळ केल्यार बंदखण मेळटली. विरोध जावपी कुटुंबांक सरकार आसरो घरांत दवरतलो. सुरक्षा आनी वकिलूय दितलो. 30 दिसांची नोटीस दिवन लग्नाची नोंदणी करपाक मेळटली वा दोगूय हिंदू आसल्यार धर्मीक पद्दतिनूय लग्न जावंक मेळटलें. अनुसुचीत जाती आनी हेर जातींतलो चलो, चली आसल्यार तांकां पांच लाख मेळटले. अनुसुचीत जमातिंकूय ही सवलत मेळटली. विधवा, विधूर आनी घटस्फोटीत जोडप्यांकूय परत लग्न केल्यार पयशे मेळटले. कायदे करून फायदो ना, ते चालीक लागतात, तेन्नाच खरें.