कर्नाटकांतलें रशियन बायलेचें प्रकरण: इस्रायली वेवसायिकान मागलो भुरग्यांचो ताबो

भांगरभूंय | प्रतिनिधी

नवी दिल्ली, खबरां संस्था: सोमारा सर्वोच्च न्यायालयान गोंयांत रावपी एका इस्रायली वेवसायीकाक बरोच तापोवन काडलो. ताच्यो धुवो आनी रशियन बायल कर्नाटकाच्या रानांतले गुहेंत रावतना, तो गोंयांत कितें करतालो असो प्रस्न विचारलो. भारतांत रावपाक तांचे कडेन वैध कागदपत्रां आसात काय, अशेंय विचारलें.
वेवसायिकान आपल्या दोगांय चलयांचो ताबो मागलो आनी तांकां रशियेक धाडपाचे प्रक्रियेक स्थगिती दिवपाची मागणी केली तेन्ना न्यायालयान ही टिप्पणी केली. न्यायमूर्ती सूर्यकांत आनी जयमाला बागची हांच्या खंडपीठान म्हणलें, देश आतां एक सुरक्षीत आश्रयस्थान जालां, जंय कोणूय येवपाक शकता आनी रावपाक शकता.
11 जुलयाक कर्नाटकांतल्या कुमटा म्हालांतल्या रामतीर्थ हिल्स रानांत नेमान पुलीस गस्त घालतना 40 वर्सां पिरायेची रशियन बायल नीना कुटीना आनी तिच्या दोगां धुवांची सुटका केली. तांचे कडेन वैध भारतीय निवासी कागदपत्रां नाशिल्लीं आनी तांकां कर्नाटकांतल्या प्रतिबंध केंद्रांत धाडलीं.
26 सप्टेंबराक कर्नाटक उच्च न्यायालयान केंद्र सरकाराक बायलेक आनी तिच्या भुरग्यांक रशियाक धाडपा खातीर प्रवास कागदपत्रां जारी करपाचे निर्देश दिले. हाचे आड इस्रायली नागरीक डोर श्लोमो गोल्डस्टीन हांणी सर्वोच्च न्यायालयांत याचिका दाखल केली.

कागदपत्रां दाखयात: न्यायालय
सुनावणी मजगतीं, न्यायमुर्ती सूर्यकांत हांणी विचारलें, तुमी कोण? तुमचे अधिकार कितें? चलयांचो बापूय म्हणून तुमची वळख पटपी कसलींच आनीक कागदपत्रां म्हाका दाखयात.तांणी अशेंय विचारलें, आमी तुमकां हद्दपारीचे आदेश कित्याक दिवचे न्हय?
उच्च न्यायालयान आपल्या आदेशांत म्हणलें, बायल आनी तिच्यो धुवो फाटल्या दोन म्हयन्या सावन वैध कागदपत्रां बगर भारतांत रावतालीं. बायलेन स्वता रशियन दुतावासाक पत्र बरोवन बेगोबेग रशियेक परतपाची इत्सा उक्तायल्ली. उच्च न्यायालयान म्हणलें, भुरग्यांचे आवय वांगडा रशियेक परतप तांच्या हिताचें.
रशियन बायल आनी तिच्या भुरग्यांची सुटका आनी प्राथमीक तपासाच्या आदारार, पुलिसांनी अशें थारायलें, नीना 2016 वर्सा बिझनेस व्हिसाचेर भारतांत आयिल्ली. तिच्या व्हिसाची मुदत सुमार आठ वर्सां आदीं सोंपिल्ली. तेन्नाच्यान ती भारतांत बेकायदेशीरपणान रावताली. सुमार एका सप्तका उपरांत गोल्डस्टायन ह्या इस्रायली नागरिकान मीडियांत दावो केलो की तो कुटिनाचो घोव म्हूण.
गोल्डस्टायन असोय दावो करता की, तो कुटीनाक आठ वर्सां आदीं गोंयांत मेळिल्लो. तांकां मोग जालो. भुरगीं जालीं. तो तांकां परत हाडपा खातीर कायद्याची मजत घेता. कुटीनान गोल्डस्टायनच्या दाव्यांचेर प्रतिक्रिया दिली, तो म्हजो घोव न्हय. आमचें केन्नाच लग्न जावंक नाशिल्लें. तो म्हज्या खंयच्याच भुरग्याचो बापूयय न्हय. हांव ताका फकत वळखतां. तो म्हाका आनी म्हज्या भुरग्यांक त्रास करता. तांणी आमचे खातीर निर्ण घेवचे न्हय. तें तांणी बंद करचें. आमकां ताचे कडल्यान पयस रावपाचें आसा. ताचे पालक खूब गिरेस्त. ताका जें जाय तें मेळोवपाची संवय आसा. ताचीं हट्टीपणां आमची पुराय जीण उध्वस्त करता.