भांगरभूंय | प्रतिनिधी
शिवमोग्गा/विजयपूर, खबरां संस्था: कर्नाटकांतल्या शिवमोग्गा आनी विजयपूर जिल्ह्यांतल्या ईद मिलाद अन-नबी मिरवणुकीं वेळार वाद सुरू जाला आनी सोशल मिडियाचेर व्हायरल जाल्ल्या व्हिडियो आनी ऑडियो क्लिपांक लागून रागाची ल्हार उफेल्या. हे संबंदी पुलिसांनी गुन्यांव दाखल केल्यात.
भद्रावती हांगच्या गांधी सर्कल लागसारा तारिकेरे रोडवर काल रातीं ८ वरांचेर मिरवणुके मजगतीं कांय तरणाट्यांनी ‘पाकिस्तान झिंदाबाद’ अशो घोशणा दिल्ल्याचो १२ सेकंदांचो व्हिडीओ सोशल मिडियाचेर व्हायरल जाला. डीजे म्युझिकाचेर नाचतना घोशणांचे आवाज आयकूंक येतात, असो दाव. व्हिडीओंतल्यान करता.
शिवमोग्गाचे पुलीस अधीक्षकानी म्हणलेंे, काल भद्रावती हांगा ’पाकिस्तान झिंदाबाद’च्या घोशणांचो एक व्हिडीओ व्हायरल जाला. आमी हे विशीं एफआयआर नोंद केल्या. संबंदीत वळख पटोवपाचें काम चालू आसा. हो व्हिडियो खरो आसा काय? तो खंय, केन्ना काडला हाची चवकशी करप सध्या सुरू आसा. हें कळ्ळे उपरांत फुडली कारवाय करतले.
ऑडिओचेर गुन्यांव दाखल
५ सप्टेंबराक विजयपूरांत जाल्ले ईद मिलाद मिरवणुकेंत एक दाहक ऑडियो ट्रॅक वाजलो हें उजवाडाक आयलां. ह्या ऑडिओंत म्हणिल्लें , ‘१५ मिनटां खातीर पुलिसांक काडून उडोवचें, मागीर कोणाक कितली तांक आसा तें दाखयतले, हिंदुस्तान करून दाखयात.‘ हो, संदेश हिंदींत आसा.
ह्या प्रकरणांत पुलिसांनी तिगां आड गुन्यांव नोंद केला. फुडलो तपास पुलीस करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
