भांगरभूंय | प्रतिनिधी
नवी दिल्ली, खबरां संस्था: कोरोना काळा उपरांत तरणाट्यांक अचकीत मरण येवपाचो आंकडो वाडला. हे घडणुके उपरांत कोरोना वासिनाक लागून तरणाट्यांचें अचकीत मरण वाडलां अशी चर्चा सगळे कडेन जाली. तशेंच कोरोनाच्या वासिनाच्या दुश्परिणामां विशीं जायत्यो विरोधाभासी चर्चा जातात. केंद्रीय भलायकी मंत्री जे. पी. नड्डा हांणी हालींच राज्यसभेंत हे विशीं म्हायती दिल्या. देशांतल्या तरणाट्यांक अचकीत मरण आयिल्ल्या फाटल्यान कोरोनाचें वासीन ना अशें तांणी सांगलें.
राज्यसभेंत उलयतना नड्डा हांणी सांगलें, आयसीएमआरच्या अभ्यासांत अशें दिसून आयलां, कोरोना वासिनाक लागून अचकीत मरण येवपाची शक्यताय उणी जाता. आयसीएमआरच्या नॅशनल इन्स्टिट्यूट ऑफ एपिडेमिओलॉजीन १८ ते ४५ वर्सां पिरायेच्या लोकांचेर अभ्यास केलो. हातूंत १ ऑक्टोबर २०२१ ते ३१ मार्च २०२३ ह्या काळांत मरण आयिल्ल्या लोकांचो आस्पाव आशिल्लो. ह्या संशोधना खातीर देशांतल्या १९ राज्यांतल्या ४७ हॉस्पिटलांतल्यान नमुने घेतले. तातूंतले २,९१६ नमुने काळजाचो आताक आयले उपरांत जिवे उरिल्ल्या लोकांचे आशिल्ले. जाल्यार ७२९ नमुने अचकीत मरण आयिल्ल्याचे आशिल्ले. ह्या संशोधना उपरांत एक वा दोन कोरोना वासीन घेतले उपरांत अचकीत मरण येवपाची शक्यताय खूब उणी जाल्या अशें म्हणलां.
अचकीत मरण येवपा फाटलीं कारणां?
कोरोनाक लागून हॉस्पिटलांत दाखल जाल्ले लोक.
कुटुंबांतल्या कोणाक तरी अचकीत मरण.
मरणा पयलीं ४८ वरां आदीं चड प्रमाणांत सोरो पियेवप.
मरणा पयलीं ४८ वरां आदीं जिमांत व्यायाम करप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
