भांगरभूंय | प्रतिनिधी
भांगरभूंय । प्रतिनिधी
पणजीः गोंय गृहनिर्माण मंडळान वेवसायीक वापरा खातीर हरवळ्यां आनी काणकोणां दोन प्लॉट पावणे खातीर काडल्यात. पूण हे प्लॉट विकते घेतले जाल्यार इत्सुकांनी करोडपती आसप गरजेचें. सुमार 4 हजार चौ. मी. आशिल्ल्या दोनूय प्लॉटां खातीर सुरवातेची गुंतवणूक रक्कम 1 कोटीची आसा आनी ह्या प्लॉटसांची पावणी 95 लाख ते एक कोटी सावन सुरू जातली, अशीं म्हायती गोंय गृहनिर्माण मंडळान जारी केल्लें कळोवणेंत दिल्या.
गोंय गृह निर्माण मंडळान ई- पावणे वरवीं वेवसायीक प्लॉटांची सरळ विक्री खातीर ऑनलायन अर्ज मागयल्यात. पात्र अर्जदारांनी 18 ऑगस्ट ते 8 सप्टेंबर मजगतीं गोवा ऑनलायन हें वेबसायटीचेर अर्ज करचें, अशें मंडळान कळीत केलां.
हे कळोवणेंत हरवळ्यां- सांखळे 3828 चौ. मी. वेवसायीक प्लॉटाचो आस्पाव आसा. ह्या प्लॉटाची सुरवेची किंमत दर रु. 2500 आसा. ह्या प्लॉटा खातीरची उण्यांत उणी पावणी 95.70 लाखा सावन सुरू जातली. ह्या प्लॉटांत बांदकाम करपा खातीर 100 एफएआर मेळटलो.
तशेंच श्रीस्थळ काणकोणां 3928 चौ. मी. दुसरे वेवसायीक प्लॉटाचो आस्पाव आसा. ह्या प्लॉटाची सुरवेची किंमत दर चौ. मी. रु. 3000 आसा. ह्या प्लॉटा खातीरची उण्यांत उणी पावणी 1.17 कोटी सावन सुरू जातली. ह्या प्लॉटांत बांदकाम करपा खातीर 60 एफएआर मेळटलो.
चड बोली लावपी व्यक्तीक हे दोनूय प्लॉट्स विकते घेवपाक मेळटले. ह्या दोनूय प्लॉट्सां खातीर सुरवेची गुंतवणुकेची किंमत रु. 1 कोटी इतली आसा. ते भायर इत्सुकांक रु. 5000 नोंदणी शुल्क भरून ताचेर रु. 900 इतली जीएसटी भरची पडटली. हे नोंदणी शुल्क परत मेळचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
